ألفرد الماضي

لي بيريد إنو يسمع...

19 كانون الأول 2022

02 : 00

«أشرفية البشير» بتصرخ لبنان بخطر...لبنان الجغرافيا والديموغرافيا بخطر...

ما تعلمنا كمسيحيين انو بوحدتنا وقوتنا، وعدم صراعنا على السلطة، منحافظ على لبنان مساحة حرية ومنحافظ كمان على لبنان الـ 10452كم2… ما تعلمتوا كمسلمين وخاصة الشيعة انو ما في طايفي بتقدر تحكم لبنان لوحدا... ما تعلمنا كلنا انو لعنة الجغرافيا ممكن تقسّم لبنان... ما تعلمنا كلنا انو نعمة الجغرافيا هي الوحيدي يلي بتوحد لبنان... ما تعلمتوا كمسلمين انو الديموغرافيا مش هيي الحل للبنان...

اسألوا التاريخ بيخبركن... أو خلّوا التاريخ يخبر الجغرافيا والديموغرافيا كيف منحافظ عَ لبنان مساحة حرية وكيف منحافظ على وحدتو...فحذار انو تحرجونا لأنو بينتهي لبنان...

اليوم جغرافية وديموغرافية الشرق الأوسط ولبنان بخطر... شبابنا وولادنا عاطلين عن العمل ومشردين ومهجرين بكل زوايا العالم ... المستقبل ما بيرحم... تعوا كلبنانيين، بس بدون فوقية ولا عنجهية وبدون تخويف لأنو نحنا ما منخاف، نلاقي الحل حتى ما الخارج، متل العادة، يفرض الحل علينا... في كتير قبلكن استقووا علينا واحتلونا واضطهدونا وقتلونا وهجرونا... وبالأخير فلّو او إنتهوا وبقينا نحنا وبقي لبنان ...

لبنان مبادرة مسيحية، غلطنا بالماضي وعم منغلط اليوم والأرجح رح نغلط بالمستقبل، بس منعرف كيف نحافظ عليه لأنو نحنا مش مربوطين بالخارج... اتعلموا واتعظوا انو في حلول كتيرة تنحافظ على لبنان مساحة حرية... ما تجربونا... لأن التاريخ ما بيرحم... ومن له أذنان سامعتان فليسمع...

(*)رئيس أكاديمية بشير الجميل