الأب مجدي العلاوي يُعلن إقفال مراكزه

18 : 07

الأب مجدي العلاوي

أعلن خادم جمعيّة سعادة السّماء الأب مجدي العلاوي إقفالَ مراكزه بعد التطوّرات الأخيرة، إثر إقدام مجهولٍ على تكسير سيّارته وسرقة الفرن المجانيّ وتسرّب السّيول إلى مركز الأطفال، مُناشداً الكنيسة والمراجع الرسميّة التدخل.


وجاء في البيان الذي أصدره الأب العلاوي:


"لسخرية القدر.. قوى الامن بلبنان صرلها يومين عم تداهم مركز المشرّدين والمدمنين عندي بالمعيصرة لسبب مهم كتير يهدد الأمن القومي وسلامة المواطنين.. عم رمّم بيوت ولادي لأنّو الماي عم تفوت عليهن وعم حطّ خشب بمكتب إبني ماتيو ليصير مركز للأطفال..


نعم.. هيدي تهمتي.. يومين عم يسكروا طريق المركز.. عم يوقفوني عن الشّغل.. بالوقت يلي مجهول كسرلي سيارتي.. وانسرق الفرن المجاني.. ما حدا منن رد عليي.. غير بعد شي أسبوع.. وكان يلي ضرب ضرب..


يا بيّي.. أنا ما بدّي شي منكن.. بس بهالبرد.. بهالوجع... بهالقِلّة.. بهالسيول يلي عم تفوت ع ولادي.. كيف إلكن قلب هيك تعملوا فينا؟


ليه القانون عالفقراء؟.. ليه القانون عالمشرّدين؟.. إنتو أمن على مين؟ وضد مين؟..


أنا بناشد كنيستي ورعيتي والمراجع الرسميّة والحزبيّة كلها يراجعو شو عم يصير.. ويتصرّفوا لأنّو عند ربنا ما حدا فوق راسو خيمة!


ورح أعمل مؤتمر صحافي تُحدَّد تفاصيلو لاحقاً..


صلولي يا بيي!".