ألو، مرحبا ورد، عم إزعجك؟ فينا ندردش شوي؟
جيتي والله جابك، علقانة بعجقة السير.
عظيم. سمعتي شو قالوا؟قالوا إنك بالكوميديا بتمَوتينا ضحك، وبالرومنسية بتدَوبينا حب، وبالشر بتمَوتينا رعبة. إنتي شو بتفضلي؟
بعيد الشر عن قلبكن. أنا بفضل إنجح فيهن كلن من دون ما موّتكن. بصراحة أنا بحب كل الأنواع، وبحب التنويع. الناس حبّوني بأدوار عاطفية متل "عشق النساء" و"الطائر المكسور". و بالكوميديا مسلسل" بنات عماتي" عمِل حالة وبعدو لهلأ بينحَضَر.
قالوا إنك نجمة بعالم الدراما التلفزيونية، والمسرح ما عتب عليكي. طيب ليش تاركة السينما تعتب عليكي؟
للأسف ما إجت فرصة لشارك بفيلم جدّي. حلمي قدّم فيلم بمقومات مهمة يشارك بمهرجانات عالمية. انا جاهزة للسينما وناطرة العرض والفرصة، لهيك العتب مش عليي. وما تنسي إنو وضع السينما بلبنان مش ولا بد، والافلام الجيدة بينعدّوا عالاصابع ومعظمها مبادرات فردية.
قالوا انو إنتي ويورغو شلهوب شكلتوا اجمل ثنائي تلفزيوني، متل هند وعبد المجيد بالزمانات. في نيّة لعمل مشترك جديد؟
مزبوط، شكلنا ثنائي حبوه الناس كتير بالرومنتك كوميدي. صحيح تنيناتنا اشتغلنا مع غير ممثلين، بس ثنائيتنا بعدا معلّمة عند الناس، وبتمنى نستثمرها بأعمال جديدة. بس القصة مش بإيدنا. نحنا علينا نحلم ونطمح.
قالوا إنك مشكّلة عقدة لكل النساء بسبب جسمك الممشوق. شو سر رشاقتك؟
ما في سر، في إنو أنا طول عمري بعمل كتير رياضة، مش كرمال الصحة، كرمال اقدر آكل كل شي من دون ما إنصح، لأنو ضرسي طيب. بعدين طولي بيساعدني، فإذا نصحت شوي، ما بيبيّن عليي.
قالوا ما عاد حدا يسترجي يتمنى bon voyage لحدا. شو رأيك إنو هالأمنية تحوّلت فال بشع بسببك؟
اوعا يا جوزيفين، ما تجرّبي توقّعي بيني وبين bon voyage. هالقفشة آخدة مجدا، ووين ما بكون، الناس بيقولولي bon voyage. صارت "محط كلام" مهضوم، وعلّمت عند الناس بشكل طريف. أنا بعتبرها فال حلو، متل ما شخصية كرما فال حلو بمسيرتي.
هالمرة أنا عم قول شكلك بعدك علقانة بالعجقة؟
صح
لكان… bon voyage
