نعمان الترس

كتابات تستحق النشر

«بَرد بيوت»

20 شباط 2021

02 : 00

فات الهوا بْـ شبّاك ما لو أْزاز

هَزهَز عَصا الطَهّ لْ بِـ كلمة عاطفِه

لْ كانت كأنّا للدفا عكّاز

الحَرف انكَسَر صارت الكلمه عاصفِه

في بيوت ما بتكسُف الشتويّه

بيِلعَب بِـ قَلبا الطَقس "بَرد بيوت"وما بتسمع النَشرَه الجَويِّه

يمكن لأنّا خالصه مازوت

وفي ولاد نامو بْـ قلب الكراتين

تا يِحلَمو بالنار المْساكين

غِفيو وغَمْرو المَوقدِه بالحلم

فاقو بِـ جَمر التلج محروقين

والبَرد ما بيِحفَظ عمر الزغار

بيِحفَظ -لأنّو نَدل- عنوانُن

بيخاف مِن طَقِّة حَطَب بالنار

آخر هْمومو طَقِّة سنانُن