صابيع اليسْمين

صديقي الشاعر مارون أبو شقرا ودّع إمّو من كم يوم وكتب عن عرق اليسْمين ...

إمّي وإمّو راحو بأوّل يوم من تشرين أوّل

بسّ دمعتي أكبر من دمعتو بسبع سنين ...

لروح إمّو وإمّي بهدي هالقصيده :

كلْما بيرجع … بسْألو لْ تشرين

من وين جايي ريحةِ الْيسْمين ؟

وْبذكُر وقِت كنّا حَواليْكي

وٌعم ينطفو بالليل عينيْكي

وْعم يدبلو صابيعِكِ الْحلوين …

في دمعتيْن بْكيتُن عْليْكي

لليوم عمرُن صار سبع سْنين

نزْلو منِ عْيوني عَ إيديْكي

وْبعدا لَ هلّق ريحتُن … يسْمين

• شعر