- ألو رُلى، اشتقنالك.
- وأنا بالأكتر
- قِلنا زمان ما حكينا. و عَ سيرة الزمان، قالوا انو المرأة بتخاف عادة من مرور الزمن. بس انتي ما بتخافي من الزمن، بتخافي عليه، لأنك أم زمن. كيف علاقتك بزمن الوقت وزمن الابن؟
علاقتي بزمن الوقت علاقة حذرة لأنو الوقت غدار. أما علاقتي بإبني فهي متل علاقة أي أهل بإبنن المراهق، يعني فيكي تقولي متأرجحة حسب مزاجو للمراهق.
- ما بينخاف عليكي لأنهم "قالوا" إنو اسم رُلى تحريف للإسم اللاتيني "ريجبولا" وبيعني الحاكمة العاقلة وسيدة المدينة.
مين هيك قال؟ حسب معلوماتي رُلى اسم قبيلة عربية، قبيلة الحبيبين عصام وعليا، وكان اسمها اساسا الرُوَلَه، بس حتى ما تنكسر قصيدة "رلى عرب قصورهم الخيام" اللي كتبها قيصر معلوف، تم اختصار الاسم الى رُلى.
- خلص رح نعتمد تفسيرك. قالوا كمان إنك جريئة بتغريداتك السياسية والاجتماعية والانسانية. الفن والفنان بعدن قادرين يأثّروا و يغيّروا مفاهيم وقوانين برأيك؟
ما بعتقد بلبنان صار شي مرة إنو الفن أو الفنان قدروا يغيروا مفاهيم وقوانين لأنو بكل بساطة المسؤولين ما همّن يحسّنوا أحوال الناس. همّن يحسّنوا أوضاعن وأوضاع المحيطين فيهن بس.
- وضعنا مضحك مبكي. وقالوا إنك بتجيدي التمثيل لدرجة بتنزليلنا دموعنا من التأثر ومن الضحك. بين الدراما والكوميديا، لأي نوع بتميلي أكتر؟
أنا بميل للمشاعر الانسانية اللي ممكن تنوجد بأي نوع، من التراجيديا للكوميديا.
- بصوتك في نبرة حزن ودموع. حَزّنك كتير رحيل صديقك الفنان جيرار افيديسيان؟
كتيييييير.
- قالوا اللي بيروح، ما بيروح، بيصير عايش فينا اكتر. وقالوا كمان إنو انطلاقتك كانت بالسينما مع افلام متل "الصفقة". هل في صفقات وقطب مخفيّة بتخليكي تبقى بعيدة عن السينما اللي وصلت للأوسكار؟
السينما اللبنانبة هي للأسف علاقات ومحسوبيات. وبما إنها كمان قليلة كتير، لأنو صنّاعها بعانوا كتير ليأمنوا تمويل، لهيك المشاركات محدودة للكل.
- قالوا إنِك بتحملي الجنسية الكندية. شو سر رجوعك دايماً للبنان لِ بيتمنى معظم شعبو يهاجر منو حالياً؟
عيلتي كلها بكندا، كندا فيها العيلة والقلب. ولبنان فيه النَفَس والطاقة الحلوة والروح.
- انشالله ما يجي شي نهار ونروح كلنا من هالوطن.
لا، لا، شو هالحكي.
-متفائلة؟
زعلانة كتير علينا وعلى وضعنا، بس ما لازم نفقد الأمل.
