- ألو، مرحبا جوزف. قالوا إنك حامل 5 بطيخات: ممثل، مخرج، مؤدي صوت، ناقد، ورئيس تحرير دليل النهار لأكتر من 25 سنة. إنت كل هول بشكل متوازي، أو بتميل أكتر لجهة معيّنة؟
أنا ممكن أحمل أكتر من 5 بطيخات، بس الحلو وين؟ ما بحملن بذات الوقت. كل بطيخة بعطيها كل وقتي وحماسي وجهدي. ما بعمل شي ما بحبو، وكلن بحبن.
- ونحنا منحبك وكلنا منقول إنو مشاركتك بأي عمل بتشكّل ضمانة للمستوى الجيد. إنت إنتقائي لهالدرجة بأعمالك؟
إنتوا عم بتقولوا هيك، مش أنا. ممكن لأنو بشتغل كل دور بتمعُّن وكأنو أول مرة عم مثّل فيها. بحطّ ملاحظاتي وبركّب الشخصية ولما تصير تقريباً متكاملة، بتتقدّم بشكل صحيح، وهون يمكن بيتميّز شغلي. أنا إنتقائي صحيح، ما بقبل بشو ما كان. إذا ما حبّيت العمل، بعتذر عنو حتى ولو بحاجة إشتغل.
- قالوا إنو اسمك ارتبط بأهم الافلام لِ تركت بصمة بالسينما اللبنانية متل "بيروت يا بيروت" و"وست بيروت". ليش بعيد اليوم عن السينما؟
عندي أفلام غيرن كتير، بس للأسف السينما هي بعيدة اليوم، وأصلاً ما عم ينعمل أفلام كتير. مع غرامي القاتل للسينما، إذا إجاني عمل مش راضي عنو، ما بقبلو. أنا بالإنتظار على أمل يتحسن وضع البلد والسينما.
- ع سيرة السينما، قالوا عُرض عليك فيلم عالمي مع مخرج شهير، بس إعتذرت عنو.
صح. مدير إنتاج بلجيكي حكاني بخصوص فيلم "هوليوودي"، ومخرجو شاف "وست بيروت" وطلب يتصلوا فيّي. ما عطاني بالأول تفاصيل وطلب مني سجّل 4 دقايق بحكي فيهن عن حالي. بلا طول سيرة، لما اختاروني، سألتو اذا في شي سياسي، جاوب إنو اكشن. ولما عرفت إنو ستيفن سبيلبرغ هو المخرج، قلتلو "عم تمزح"؟ وما كان عم يمزح، وكان الفيلم Munich. طلبت وقت لاعمل اتصالاتي بالامن العام لأنو في ممثلين اسرائليين بالفيلم. وطبعاً إعتذرت لأنو كنت إنحطيت عاللائحة السودا.
- ما ندمت على هالفرصة؟
أنا ما بندم ع شي. كلو بيقطع معي.
-بس ما بيقطع معك توقّف رياضة. قالوا إنك بتنتبه على صحتك، و ما بتدّخن غير سيجارة لف.
أنا بعمل رياضة بإنتظام بالنادي، إلا إذا في سفر أو تصوير. الحياة حلوة، ومع الرياضة والأكل الصحي ممكن تعيشي أطول وبصحة أفضل. حتى بالدخان أنا صحّي، بدخّن خفيف، وكل ساعة بلف سيجارة بلدية تبغ نضيف.
- دردشتنا كمان كانت خفيفة نضيفة، شكراً جوزف.
