- ألو مارسيل مارينا، بونجورنو، إشتقنالك.
حبيبتي أم الزوز، وأنا كمان. بونجورنو ?Come stai? bene
- إنو مش كتير bene، لأنو سمعناهن قالوا إنك عايشة بشكل دائم بايطاليا. شو عم تعملي بإيطاليا؟
والله ست بيت، relax. إنجبرنا أنا وزوجي سمير معلوف من كم سنة نترك لاميركا أول شي، بسبب الأوضاع بلبنان والشغل الخفيف كتير. ورجعنا إنتقلنا عَ ايطاليا، واشترينا بيت حدّ بنتي وأولادا.
- يعني مزبوط اعتزلتي الفن من بعد ما كنتي نجمة الحقبة الذهبية بالمسرح والسينما والتلفزيون؟ وشو ممكن يخليكي ترجعي علبنان وعالفن؟
أنا ما تركت لبنان ولا اعتزلت الفن أبداً. لبنان والفن بدمّي وحاملتن بقلبي. إيطاليا قريبة كتير من لبنان، وبالعلامة صوّرت سنة 2018 مسلسل "دورة، جونية، جبيل"، ومستعدة إرجع أول ما ينعرض عليّي أي عمل فني.
- "دورة، جونية، جبيل" آخر عمل قدمتيه بلبنان، ومن الروشة قالوا كانت بدايتك بالتمثيل، وقرن بوظة كان سبب إختيارك للدور. صح؟
صح. يومها كنت كتييير صغيرة وكنت أنا والوالدة عالروشة بمحل "دولتشيه فيتا" عم ناكل بوظة. فجأة بيشوفني المخرج غاري غارابتيان وبيسأل أمي إذا بتوافق مثّل بفيلم "غارو". أمي وافقت لأنو كنا بالصيّف وما في مدرسة. وهيك فتت عالفن، وما صدقت إنو حلمي تحقق لأنو كنت دايماً أوقف قدام المراية واحكي مع حالي.
- قالوا إنو لقبك بالبدايات كان "البيسة الصغيرة"، وهالبيسة وقفت قدام عمالقة من لبنان ومصر متل محمود المليجي بمسلسل "المشوار الطويل". مين اخترلك هاللقب، وليش؟
الاعلاميين هني اللي لقبوني بـ"قطة المسرح الوطني"، يمكن لأني كنت مهضومة، يمكن.
- مش بس كنتي مهضومة وموهوبة، ومحظوظة كمان، وبينطبق عليكي قول "مصائب قوم عند قوم فوائد"، بدليل مشاركتك بفيلم "بنت الحارس" مع الرحابنة. شو القصة؟
عن جد مصائب قوم عند قوم فوائد لأنو الدور كان بالأساس للمطربة هدى أخت فيروز. بس هدى طلعت حامل بهيديك الفترة، وهيك نزلوا الرحابنة عَ مسرح شوشو واختاروني. وطبعا كان حظي كتير حلو إني إشتغلت معن.
- إنتي كنتي نجمة مسرح شوشو، بس قالوا إنو زعل منك بفترة، واستبدلك بالممثلة المصرية نيللي؟ شو السبب؟
شوشو ما زعل مني، بس بفترتها كان في غلا معيشة متل اليوم، وطالبنا بزودة، وما قدر يلبينا. لهيك تركنا وعملنا شانسونييه بمسرح كازينو فريد الاطرش، وشوشو استعان بالممثلة المصرية نيللي.
- مارسيل مارينا، من الصعب الفن اللبناني يستبدلك. لهيك نحنا بانتظار عودتك، لتكمّلي "المشوار الطويل" بعالم التمثيل. Ciao bella.
