ماري القصيفي

كتابات تستحق النشر

13 آب 2020

02 : 00

ALEXANDRA

ما عادوا عَمْ يلعبوا

قدّام البواب

تفرفطوا متل ورقة ورد

يبست بهوني كتاب:

الزْغار ماتوا

ومِشْ رح يصيروا كبار

لبسوا حرام الدفا

وتلفلفوا وراحوا

بالبرد شو بيحلا الغفا

بس هِنْ ما ارتاحوا

عم يندهوا وين الوفا

وباب العمر

كيف ضاع مفتاحو


***


ماري القصيفي



الزغار عن جدّ سرّبوا وماتوا

غلّوا بقلب الأرض وتخبّوا

جوّات حالن ع السكت فاتوا

وحزن الدني بعيونهن عبّوا

عن جَدّ نزلت دموعن

عن جدّ احترقت وجوهن

عن جدّ دابت لعبهن

وبردت شموعن

مش رح يصيروا كبار

مش رح يتعلّموا

مش رح يعشقوا

ومرّات رح يتألّموا

مش رح يجيبوا ولاد

ولا ينطروا الْعياد...

***

مش للحرب الولاد

للغنا

للرقص

لَشَوفةْ حال،

للغنج

للشيطنة

لَشغلة بال

انِبعدوا عن البيت

وطوّلوا المشوار

للعب

والضحكة

وتَ يسألوا

ميّة سؤال،

وت يكبروا

ويختيروا،

مش ت يفلّوا

وبعدن كتير زغار

مش ت يموتوا

وما يصيروا كبار

(الى الكسندرا نجّار وكل طفل لبناني وفلسطيني وسوري وعراقي ويمني وليبي عملوهن شهدا غصب عنن وهنّي ضحايا بمسلسل رعب وعنف وحقد وطمع وفساد وطائفيّة ومذهبيّة...)



يلفت موقع نداء الوطن الإلكتروني إلى أنّه ليس مسؤولًا عن التعليقات التي ترده ويأمل من القرّاء الكرام الحفاظ على احترام الأصول واللياقات في التعبير.