بالوضع "الدراماتيك" اللي عايشينو، بعد في شي "فنتاستيك" بحياتنا؟ أكيد في… الفن! لهيك رح ناخد هدنة إيجابية مع الممثّلة لمى لاوند، لندردش سوا عن قصص "فن - تاستيك" بحياتا.
-لمى، إنتِ شخص إيجابي وبيضجّ بالحياة. من وين بتستمدّي كل هالطاقة وكيف بتحافظي على معنوياتك، خصوصاً بوضع تعبان متل وضع لبنان؟
صحيح، أنا شخص إيجابي، دايماً بفضّل شوف نصف الفنجان المليان. يمكن لأنو واجهت إيام كتير صعبة بالحرب الأهليّة ودايماً كانوا أهلي يعتمدوا عليّي مع إني كنت صغيرة، وهالشي خلّاني دايماً حافظ على معنويات عالية كرمالن، حتى لو كنت تعباني او معنوياتي بالأرض. من وقتها كبرت وتجوّزت وإجاني أولاد وهلّق أحفاد، ولازم ضلّني قدّامهم السند والمثل الإيجابي.
-بس كلّنا منمرق بمراحل منقشط فيها نفسياً ومعنوياً. شو بتعملي لتغيّري مودِك؟
من قبل، لمّا كنت "دبّرِس"، كنت خاف روح لأقصى حد، للـ "Extrême". مثلاً إذا كتير منرفزة، بخاف مثلاً روح إصبغ شعري أخضر، يعني ممكن أوصل لهون. يا ما حارقة شعري قدّ ما كنت فش خلقي لما كون "مدّبِرسة". هلأ ما بقى أعمل هيك، صرت بقعد إحضر أفلام بوليسيّة. كلّ شي في عنف بحضرو وبطلّعو لبرّا. "C’est fantastique"، شو بدّي قلّك؟
-عم بتخايلِك بشعر أخضر، أكيد بتطلعي حلوة. وعَ سيرة الحلا، طبعاً نحنا متّفقين إنو الروح الحلوة والنفسيّة الطيّبة هني الجمال الحقيقي، بس إنتِ ستّ بتهتمّ كمان بشكلا وأناقتها. قدّيش الإهتمام بالمظهر بيرفع من معنويات المرأة عادةً؟
جمال الروح غير جمال الشكل. جمال الروح صاير عملة نادرة بهالإيام لسوء الحظ، الناس تغيّرت والنفسيات بشعة. يلّي عندو جمال الروح، الله ناعم عليه بجمال لا يفنى. أكيد أنا بهتمّ بشكلي وأمي هيك، وأنا أخدت هالشي منها. وما في شك إنّو الإهتمام بالشكل بهالإيام الصعبة بيساعد الست لتكفّي وتحسّ حالها قوية، ومتل كأنّو أخدت جرعة أمل وقوّة بوجّ المشاكل الحالية.
-شاركتي بكتير أفلام سينما ومسلسلات، بس بإعتراف كلّ مين حضروا مسرحية "ميري كريم"،إنتِ قدّمتي دور "فنتاستيك". قديش الوقفة لأول مرّة عالمسرح، بتعطي الممثّل فرح وخوف بذات الوقت؟
تجربتي الأولى بمسرحية "ميري كريم" كانت فعلاً نقلة نوعية بمسيرتي المهنية. تجربة "فنتاستيك" بكل ما من معنى لهالكلمة! ما كنت متصورة صيب الشخصية ميّة بالميّة هالقدّ، و الناس حبّوا كتير أدائي. الشعور كان رائع لمّا نسمع تفاعل الجمهور والزقفة وكلامن الحلو عن أدائي. شعور بحبّ يتكرّر.
-طيّب، من بعد "الست رلى متري"، شو الدَّور اللي بتحلمي تلعبيه، وبتحسّي ممكن يكون نقلة نوعية بمسيرتك؟
أي دور بيطلب منّي شغل وتحدّي إلي أنا قبل أي حدا تاني. دور مركّب وما بيشبهني. مع العلم إنّو كلّ الأدوار في منها شي بشخصيتنا، حتى لو نحنا ما منشوفها. عبالي دور فيه تنوّع بنفسية و أخلاق وتصرّفات الشخصية يلي عم بلعبها.
-قبل ما ننتقل من عالم الفن، مين أكتر شخص "فنتاستيك" تعرّفتي عليه بالوسط الفني؟
ما بقدر حدّد شخص واحد، لأنو أنا من الأشخاص اللي قدرت أعمل صداقات كتيرة "فنتاستيك" بالوسط الفني، بعكس كتير ناس. ما رح سمّي لأنهن كتار.
-بتحبّي كمان الحيوانات وبتهتمي فيهن وبتحاولي تلاقيلن بيت. حبّ الحيوان غير المشروط لصاحبو، بيعطيكي سعادة وراحة نفسية؟ وهل برأيك الحيوان أوفى من الإنسان وبيطمر فيه المعروف أكتر؟
حبّي للحيوانات ما إلو حدود. ومن كل قلبي بساعد الحيوانات المشرّدة و المعنّفة. وهيدا واجب علينا كلّنا لأنّو ربنا خلق هالأرواح لنحميها مش نعذّبها. الكلب مش بس صديق للإنسان لأنو في أصدقاء بيغدروا وما بكونوا قد الوفا المطلوب. الكلب وفاءو لامتناهي، لو شو ما نعمل فيه بضلّ يحب صاحبو. أنا بقول هوّي الكائن الوحيد يلّي بحبّك أكثر من نفسو متل الأم والأب. و مش كلّ الأهل بيحبّوا ولادن أكتر من حالن للأسف.
-الحياة والتجارب بتعلّمنا كتير. شو أكتر درس "فنتاستيك" تعلّمتيه خلال مشوارك بهالحياة؟
تعلمت كتير دروس "فنتاستيك"، ومن أهمّن عدم الوثوق بشخص على العمياني، والإيمان إنو يلّي إلك ما حدا ممكن ياخدو منك، وما تزعلي على أي شي ما ظبط لأنو ربنا كاتبلك شي أفضل. ورح يوصلّك حتى لو كلّ العالم تكتّل ضدّك.
-بالأوقات الصعبة، الذكريات الحلوة بتقوّينا. شو أكتر موقف أو لحظة رائعة ما ممكن تنسيها بحياتك؟
أحلى لحظة ما ممكن إنساها وبتفرّحني من جوّا قلبي، هيّي اللحظة يلّي بشوف أولادي وأحفادي بكلّ مرّة بتوقع عينيّي عليهم.
-سؤالي الأخير عن لبنان. رغم كل مشاكلو، كلّنا ما فينا نتخلى عنّو. شو القصص الـ "فنتاستيك" بلبنان برأيك؟
الـ "فنتاستيك" بلبنان هو شعبو يلّي من أذكى وأنجح شعوب العالم ويلّي مع كلّ شي عم يمرق فيه، بسجّل إبداعات عالمية وين ما كان. لبنان قطعة سما ومنارة ما بتنطفي لو شو ما صار. لبنان أسطورة حقيقية.
