جوزيفين حبشي

وضع دراما - TIC... دردشة فن - TASTIC... مع ريان حركة

الممثلة ريان حركة

بعد كل شي "دراماتيك" قطعنا فيه بلبنان، بعد في شي "فنتاستيك" نحكي فيه؟ أكيد في... الفن. مع الممثّلة ريان حركة، اللي عم تحتفل اليوم (4 كانون التاني) بعيد ميلادها، رح ندردش سوا عن قصص حلوة وإيجابية بحياتا.



- ريان العمر كلّو وعقبال ميّة أمنية حلوة بتحقّقيها بحياتك.

شكرا كتير.



- إنتِ من الجيل الجديد اللّي كنّا نقول عنّو "نيّالو ما عاش الحرب اللّي عشناها"، بس للأسف حظّكن طلع أسوأ من حظّنا. وسط كلّ هالمآسي، كيف عادةً بترفعي معنوياتك؟

اللّي بيخلّيني إستعيد معنويّاتي بالظروف الصعبة، لمّا فكّر بناس بحبُّن وبلبنان قديش حلو وبشعبو وعنفوانو. لمّا فكّر إنو نحنا شعب ما منستسلم. الأمل بالله، والإيمان إنّو كلّ شي رح يكون منيح بيرفعولي معنوياتي.



- وإذا "مدَبِرسي" ومش رايقتلِك، كيف بتستعيدي إيجابيتك؟

بصلّي، وإذا كنت كتير "down"، بنام. بهرب بالنوم صراحة. وبسمع كمان موسيقى لأنها بتريّحني. ممكن لعبد الوهاب وممكن لنانسي عجرم، يعني حسب كيف أنا حابّة غيّر مودي.



- منعرف مُودِك الغنائي بميل لملحم زين. لمين بتميلي من الممثلين العالميين وبتتمني تشكّلي معن ثنائي "فنتاستيك"؟

إذا شي يوم صوّرت فيلم بهوليوود، بحب يكون مع جينيفر أنيستون، ومع رايان غوسلينغ وزاك إيفرون. من الممثّلين العرب، بحبّ كتير الإستاذ بسّام كوسا وبتمنّى شارك بمسلسل معو.


- إنتِ خريجة إعلام. شو الـ "فنتاستيك" بمهنة التمثيل، خلّانا نخسرك كزميلة ونربحك كممثلة؟

من أنا وصغيرة بحبّ التمثيل وكنت محتارة بينو وبين الإعلام. قمت درست إعلام واشتغلت بالتمثيل. يمكن ما تخسروني بالإعلام "completely"، لأنّو معقول إرجعلو شي يوم، بس حالياً التمثيل كتير مستهويني، وبحبّ شغلي وعندي شغف كبير للفن.



- شغفك واضح من خلال نجاحاتك بمعظم أدوارك. بين كل شخصياتك، أي شخصية الأقرب لقلبِك، وأي دَور بتعتبريه "فنتاستيك" بمسيرتك؟

دَوْر لميس بسلسلة "للموت" هوّي الأقرب لقلبي، لأنّو حلو وعطاني خبرة وعملّي إنتشار عربي كبير. الدَّور الـ "فنتاستيك" هوّي نور بمسلسل "أولاد آدم". صحيح كان صغير بالمساحة، بس كان إلو تأثير كبير وعمل خضّة قوية.



- أيّ شخصيّة بتتمنّي تلعبيها بالمستقبل، وممكن تكون نقلة نوعيّة بمسيرتك؟

في كتير أدوار بتمنّى جسّدن بالمستقبل، وحالياً عم صوّر مسلسل مع شركة "إيغل"، وكتير حابّة دَوْري . بنت نمرودة، وقحة، ما بتشبهني وما بتشبه أي شخصية قدّمتا من قبل. بحسّ هالدَّور رح يكون نقلة نوعيّة بمسيرتي.


- عم تحكي عن مسلسل "بالدم"؟

لأ. هالمسلسل مش لموسم رمضان، وهيدي أول سنة بغيب عن السباق الرمضاني. المسلسل 45 حلقة وبعد ما تقرّر عنوانو. كان لازم يتصوّر من قبل، بس تأجّل، لهيك ما قدرت كون بمسلسل "بالدم" اللي عم يتصوّر بذات الوقت حالياً.


- في مسلسلات بتغيّر حياتنا المهنية، وفي أشخاص بيغيّروا حياتنا الشخصية. مين بتشكري على وجودو الرائع بحياتك؟

أكيد أهلي. أمي الله يطوّل بعمرا، وبيّي الله يرحمو، وإخواتي اللّي هنّي الداعم الأساسي إلي، و كلّ شي بحياتي. لولاهم أنا ما وصلت لهون، وما قويت لهالدرجة.


- اليوم عيد ميلادك. شو أحلى هدية "فنتاستيك" تلقّيتيها بحياتك لحد اليوم؟

أحلى هدية بحياتي، كانت لمّا هديت حالي سيّارة من مصرياتي وتعبي.


- لو قدّامِك هلّأ في قالب كاتو وشموع، شو الأمنية اللي بتتمنّيها، حتى لو مستحيل تتحقق؟

يا ريت بيّي بيرجع، بس مستحيل هالأمنية تتحقّق. عندي أمنيات كتيرة، متل إنّو إختي تجيب "baby" بنت، وخلّيها تطلع متلي، واللّه يطوّل بعمر أمي وإخواتي وكلّ الناس اللي بحبّن، و عمر أهلن، لأنو الأهل أهمّ شي بالحياة.


- صحيح، الأهل والوطن أهمّ شي بالحياة، لهيك رح نختم بالمسك مع لبنان. شو أكتر شي بتشوفيه "فنتاستيك" بالبلد رغم كل مشاكلو؟

كل شي عنّا "فنتاستيك". لبنان واللبنانيّي غير، وهيدا مش تحيّز أو شوفة حال، هيدا رأي كتير ناس بيِجوا لعنّا من كلّ دول العالم. لبنان طاقتو إستثنائية، طقسو بيجنّن، طبيعتو روعة، جمالو فريد من نوعو. بالرغم من كل شي عم بيصير فيه، أنا بموت فيه.


- انشالله بتعيشي فيه، وبتعيشي أجمل عمر ونجاحات. شكراً ريان وعيد سعيد مجدّداً، وصار فيكي ترجعي على التصوير.