شي مرّة حلمتوا تشوفوا صفاء مشنكلة مرطبان البو فاس من ميل وصافي من ميل، وآخر همها غضب سيف وغيرة النقيب سما؟ شي مرّة حلمتوا تسمعوا كارما عم تقول من كل قلبا "bon voyage" لتالا مرتو لزيد، وتشوفوا الحجة رجاء شالحة حجابها بالرياض، ورندة عم تشتري جاكيت جلد لحماتها نجوى من عند شاهين ابن بديعة، وزيد اللي قلبو عم يغلي على طفل صبي، عم بيقنّع نور تتوحّم على ابن نادين الراسي اللي مرافقها، بس نور مفَوْكسة على فرح بنت سهاد، وعلى أماندا سيفريد بنت ميريل ستريب بفيلم "Mamma Mia"؟
ع أمل القدر يستجيب والـ "bébé" تطلع متلن صوتا حلو، ويعزفلها انطوني هوبكينز (إذا الله عطاه عمر) أغنية "Like a Cloud" أو "I have a dream"؟
شي مرّة حلمتوا إنو أمير رفع دعوى ضد ملحم اللي خطفلو خيّو غسان، عند نعمة الأفوكاتو، بس نعمة اعتذرت منّو لأنها كتير كتير كتير مشغولة بقضية هانيبال ليكتر، ونصحتو يتّصل بالمحامية غالية سعد لأنها متخصصة بقضايا العيلة؟ أما إذا أمير كان ناوي يخلص من ملحم بطريقة محبوكة ومتقنة من دون أي ثغرة، فما إلو غير ندين جابر.
شي مرّة حلمتوا إنو يسرا وليلى علوي عم بيطبّقوا جمال سنّان ينتجلن "للموت 4" من بطولتن، وسحر رح تقطعلن الطريق و "إنتوا زميلاتي وحبيباتي، بس الشغل شغل، مش كده"؟
شي مرّة حلمتوا انو جلال يئِس من يسار اللي شكلا ضاربة عينا على ماثيو ماكونهي، وقرر يطبّق بوسي شلبي؟ ممكن، ما تنيناتن إعلاميات…
أوقات منحلم نشوف كلّ هالشخصيات الفنية العربية والعالمية، فايتة ببعضا وبحبكة وحدة بمسلسل واحد أو فيلم أو مسرحية. وبما إنو "Life is a dream"، الحلم تحقق مبارح بالعاصمة السعودية قدّام عيوني، من خلال حفل أوركسترالي موسيقي استثنائي بعنوان "Life is a dream"، قدّمو النجم العالمي السير أنتوني هوبكنز ضمن فعاليات "موسم الرياض" بنسختو الخامسة. حفل جمع نجوم لبنانيين ومصريين وسوريين وهوليووديين، وخلّانا نحلم بسيناريو فيلم لبناني عربي عالمي مشترك، ونغنّي مع لطيفة "انشالله، انشالله".
