لبنان متل الغيمة، ساعة بيشتّي علينا سلبيّات ونشاز، وساعة إيجابيات وإنجاز. بس مع النجمة الصاعدة بعالم الغناء والتمثيل ماريلين نعمان، عطول في أمل بحياتا.
- ماريلين، في إجماع على محبّتك وموهبتك، وهالإجماع "الفنتاستيك" نادراً ما يصير. شو سرِّك؟
ما بعرف شو سرّي، بس بعرف إنّي كتير بحب شغلي، وإحكي العالم من خلال الفن، بالتمثيل أو بالموسيقى. وبحبّ ضلّني صادقة، رغم إنّو أوقات بيكون هالشّي كتير صعب.
- سرِّك إنك حقيقيّة ومتواضعة. وهون ما بخفيكي سرّ إنّو كتار بيعتبروا الجيل الجديد، جيل الإنحدار بالذوق الفني. إنتِ ضدّ النشاز اللي خصّصتيلو أغنية. هالذوق "الفنتاستيك" كيف تكوّن عندك؟
مع إحترامي للجميع، أنا بعتبر إنّو بكل جيل، في عالم بيعملوا إشيا حلوة، وعالم بيقدّموا إشيا هابطة. يمكن لأنّو هلأ صار في "سوشل ميديا" و "Exposure" على كلّ شي، انفضح جيلي، لا أكتر ولا أقل. بخصوص الذّوق الفني، بعتقد لأنّي كتير سمعت موسيقى غربية وشرقية. عيلتي ما بتمتهن الفنّ، بس الفنّ كان جزء كبير من حياتنا، وهيدا خلّاني إنغرم بالموسيقى اللي عرّفوني عليها أهلي من أنا وصغيرة.
- الوضع بلبنان هبّة "دراماتيك"، وهبّة "فنتاستيك". نجمة "ع أمل"، كيف بتحافظ عالأمل بحياتا؟
أوقات كتير ما بحافظ عالأمل، وبزعل من حالي، وبرجع قول طبيعي نمرق بطلعات ونزلات. "It’s a roller-coaster" إنّو الواحد يكون لبناني. برفع معنوياتي بالعالم اللّي حولي، لما شوف إنو كلّنا بالهوا سوا، ومضطرين نوعى الصبح ونعمل اللّي علينا نعملو. وبعتبر حالي "Chanceuse" شويّ زيادة، لأنّي بوعى و بعمل شي كتير بحبّو. هيدا بيعطيني أمل.
- من بعد "عَ أمل"، السنة إنتِ "حنين" بمسلسل "بالدم". لأي مرحلة من طفولتك عندك حنين يا "حنين"؟
في عندي كتير ذكريات، بس أكتر مرحلة بحنّلا لمّا أختي كانت بعد ما تجوّزت. كنا أنا ويّاها وأختي التانية، ننام ونوعى بنفس الأوضة وبنفس الوقت. نتشارك كلّ أخبارنا بالليل، وأنا كنت أكتر إصغاء، لأنّي الصغيرة وهنّي المراهقات. هيدي الفترة كتير بحبّا.
- غير مشاركتك بـ "The Voice"-فرنسا، أيّ محطة بتعتبريها مفصليّة بحياتك؟
مشاركتي بـ "The voice"، محطة كتير مهمّة، لأنو خلّتني إسأل حالي لأوّل مرّة كلّ الاسئلة الأساسية بحياتي واللّي عطول برجع بسألن. عندي كتير محطات مفصليّة، مهنيّة وشخصية ونفسية وجسدية، وهنّي اللي كوّنوا مين أنا اليوم. إذا بدّي حدّد، مرحلة "ع أمل" هيّي مرحلة كتير مهمّة بآخر سنتيْن.
- المرحلة عرفنا مين بتكون. مين الشخص اللي بتعتبريه نعمة بحياتك الشخصية والمهنيّة؟
لين طويلة صديقتي ومديرة أعمالي، أضافت أول شي على حياتي المهنية، لأنّو كتير اتفقنا بالشغل سوا. واكتشفت بعدين إنو الصداقات فيها تنبنى مع الوقت. من ورا شغلنا سوا، اكتشفنا قدّيش عنّا مبادئ وقيم مشتركة ووعي وقدرة على التواصل. اكتشفت إنّو حتى الصداقة المبنيّة عالعقل بالأول، هيّي كتير غالية. ما بحسّ في شي ممكن يفصلني عن هيدي المخلوقة بعد اليوم.
- التناغم بينك وبين لين واضح لكلّ مين بيعرفكن. والتناغم كمان واضح مع اللّي وقفتي قدّامن خلال مشوارك التمثيلي. لو قادرة تختاري ممثل عالمي، لتشكّلي معو ثنائي "فنتاستيك"، مين بيكون؟
صعب هالسؤال. بتعرفي لمّا الواحد يدرس سينما، قديش بيحضر أفلام وبينغرم بممثّلين وشخصيات، بس حلو مثّل مع تيموتي شالاماي أو سيليان مورفي.
- حبّبيت إنك ما اخترتي ممثّل "كليشّيه". وأي دور بتعتبريه "فنتاستيك" لتيموتي وسيليان؟
لتيموتي بعتقد في شي لذيذ بفيلم "Wonka". كتير انلَعَب هيدا الدَّور، فالواحد بيكون ناطرو عالكوع، بس هوّي قدّمو بشكل رائع. أما سيليان، يا ربّي من وين بدي بلّش؟!
- بلّشي من أفلامو الرائعة مع المخرج كريستوفر نولن.
أفلامو بتجنّن، بس رح نقّي مسلسل "بيكي بلايندرز" اللّي خلّاني إعشقو. بنطرو مناطرة، وبكلّ حلقة بقول "لوين بعد بدّو يوصَل هالممثّل بالأداء الرائع"؟
- أنا بسمّيكي "بونبونة" وبتذكَّر قلتيلي مرّة عندك أمنية "فنتاستيك" إنّو يتحوّلوا كل همومِك لشوكولا!
بعدا الأمنية، بس بدّي إضرب حساب إنّو هَمّ إنصح من أكل الشوكولا، كمان يتحوّل لشوكولا.
- ناقشة "10452" على جسمِك. شو "الفنتاستيك" بلبنان؟
لبنان قلبي. بس هيك.
