كلمة شهر بتجي من سهرو يعني "قمر" بلغتنا السريانية (س بتحلّ مَحَل ش باللغات السامية). بلّش الشهر الزمني ببلادنا شهر قمري بدورتو الكاملة، لأنو كنا نعبد الإله القمر (سين Sen). ولمّن تطورت حياة الإنسان مع بداية عصر الزراعة صارت الشمس المصدر الأساسي بحياة المزارع والمعيار الأوّل بتسمية شهور السنة الـ 12 وفصولها الأربعة. يعني فينا نقول انتقل الإنسان للتقويم الشمسي مع تطور حياتو وحاجتو لتقويمات بتسهّل عليه تحديد تواريخ إلا علاقة بحياتو الزراعية وبسبب حركة الشمس صار ينتبه للفصول المتعاقبة المرتبطة بحركتا؛ كرمال هيك رح نحكي عن الشهور الشمسية ومعانيا يللي بعدنا عم نستعملا لليوم من أكتر من 1700 سنة فهيدا التقويم بلّش سنة 312م.
وكانت السنة 365 يوم و366 كل اربع سنين ذات الشي متل اليوم بس كانت السنة تبلش بشهر تشرين الأول وبتنتهي بشهر أيلول.
وقبل هالتقويم السرياني (الكلداني) والتقويم الروماني كانت الشهور أرقام متل ما هني الإيام اليوم وما كان إلن أسامي أو معاني.
الشهور الرومانية
كان عدد الشهور بالتقويم الروماني القديم 10 أشهر وبتبلّش السنة بشهر آذار (الانقلاب الربيعي) وكانت السنة 360 يوم وعدد إيام الشهر بين 20 – 35 يوم وأسامي الشهور كانت أرقام لحديّت ما إجا الملك الروماني Numa Pompilius سنة 700ق.م. وعدّل التقويم وعمل عدد إيام الشهر مفردة يللي كانت تعتبر أرقام الحظ، وزاد عليهن شهرين January – February وصارت السنة بتبلش بشهر كانون التاني.
وبعدين غيّر الإمبراطور يوليوس قيصر ( 46 ق.م.) عدد إيام الشهر وصارو الشهور بالشكل يللي منعرفو اليوم.
تسمية الشهور عندن كانت دايمًا إلا علاقة بالآلهة والملوك والأرقام، فمنشوف:
Mars: إله الحرب عند الرومان يللي بيتمثل بكوكب المريخ.
April: الإلهة Venus ومعناتو تفتح الزهور.
May: إلهة الربيع وبتعني "العظيمة".
June: الإله جونو The savior المخلّص.
July: يوليوس قيصر. هون صارو يطلقو أسامي الملوك عالشهور لأنو كانو يألهو الملوك وما ننسى إنو يوليوس قيصر هو يللي غيّر وعدّل التقويم.
August: أغسطس قيصر.
September: معناتو الشهر السابع بيجي من رقم 7 طبعًا حسب تقويمن يللي ببلّش بشهر آذار.
October: الشهر التامن بيجي من الرقم 8.
November: الشهر التاسع بيجي من الرقم 9.
December: الشهر العاشر بيجي من الرقم 10.
بعدين متل ما قلنا زادو عليهن :
January: الإله يانوس Janus إله الشمس حارس بواب السما.
February: أصلًا Febriuarius شهر الطهارة والنقاوة خدمة للإله Mars.
الشهور الرومانية بيستعملوها بكل بلدان الغرب وكتير من دول الشرق متل مصر والمغرب وتونس والجزائر... أما بلبنان ما أخدنا شي من الغرب واستعملنا شهورنا يللي بيستعملوها كمان ببلاد Levant وهني بالشكل التالي:
كانت بتبلش السنة بشهر تشرين الأول الشهر يللي كان يرتاح فيه الفلاح من تعب الشغل بالأرض، بعد ما يكون جني محصولا، فبيخزن مونتو وببيع جزء من الباقي وبيداكش بجزء تاني.
وشهور السنة الآرامية/السريانية، هي:
- تشرين الأوّل: "ܬܶܫܪܝ ܩܕܶܡ"، Teshri Qdem وبتعني "بداية أولى".
- تشرين الثاني: "ܬܶܫܪܝ ܐܚܪܳܝ"، Teshri Hroy وبتعني "بداية أخيرة/ تانية".
- كانون الأوّل: "ܟܳܢܘܢ ܩܕܶܡ"،Qdem KONOUN وبتعني موقد النار (موقد صغير) لكترة استعمالو إيام الشتا والسقعة وكمان بيعني الثبات والإستقرار لأنو ما كانو يشتغلو بالزراعة بهالفصل.
- كانون الثاني: "ܟܳܢܘܢ ܐܚܪܳܝ"، KONOUN Hroy
وبهالشهرين بيكنّ (يستقر) الفلاح ببيتو.
- شباط: SHBOT: بتعني الضرب والجلد والسوط... بسبب العواصف القوية يعني خبيط ولبيط الهوا... كرمال هيك بنقول: شباط اللباط.
- آذار: ODOR "ܐܳܕܳܪ"، وبتعني "رَيْ، سقاية". رَي الأرض للتحضير لموسم الزرع.
- نيسان: NEESON "ܢܝܣܳܢ"، هيدا أكتر شهر إلو معاني بحضارتنا وهو بيعني "العام الجديد" وأول مين احتفل بهيدا العيد هني السومريين (الإحتفال بعودة الإله دموزي/تموز من العالم السفلي- عالم الموت) وكان هيدا الشهر بداية السنة.
وبعدين صار بداية السنة عند البابليين وبعدين عند الآشوريين باسم أكيتو (أول نيسان) وبيحتفلو فيه من الالف الرابع ق.م. واعتبرو بداية تأسيس الحضارة الآشورية وأكيد هو بيعني بداية الربيع - بداية الحياة - بداية موسم الخصب. وتبنّو هيدي المناسبة كمان الفرس والكراد بإسم "نيروز" وصارت مناسبة قومية عند هيدي الشعوب وعند المصريين هو شِم النِسيم وعند اليهود الفصح وبالهند عيد هولي وبأوروبا كذبة أول نيسان و...
- أيّار: EYOR"ܐܺܝܳܪ"، وبتعني "نور". هيدا شهر النور وبيتفتح الزهر فيه.
- حزيران HZEIRON : "ܚܙܝܪܳܢ وبتعني الحنطة لأنو موسم حصاد القمح.
- تموز TOMOUZ: "ܬܳܡܘܙ"، الإله دُموزي يعني إبن الحياة وهيدا لفظ سومري وبيقصدو في إله الخصب الذكوري يللي عبدو السومريين وبعدين البابليين بإسم تموز وهو ذاتو عند الفينيقيين بإسم (أدوناي/أدونيس) وكان هيدا شهر الإحتفال بزواج هالإله من إلهة الحبّ "عِشتار/عِشتروت"
- آب OB : "ܐܳܒ"، وبتعني "الثمار الناضجة" يعني موسم قطف الفواكه.
- أيلول: "ܐܺܠܘܠ"، Eeloul وبتعني "نواح، عويل، بكاء، وَلوَلة" لأنو كان هيدا الشهر شهر موت الإله تموز يعني لمّن بيموت الزرع/نهاية السنة الزراعية.
