ما في حدا ما بيعرف إنو الشعب الفينيقي هو يللي اخترع الأبجدية وصدّرا للعالم، بس ما حدا علّمنا قصة ومعنى هالأحرف.
لمّن نحطّت هالأحرف كان إلا غاية، وغايتا الأساسية تسهيل التجارة ما بين فينيقيا وباقي الدول شرقاً وغرباً.
بس كيف قدرو ينتقلو من الكتابة المسمارية للأحرف الأبجدية ، هون كانت النقلة النوعية بتاريخ الكتابة، خطوة عبقرية سبّاقة ما حدا فكّر فيا قبلن حيث كانو كل شعوب الشرق يكتبو بالمسماري والمصريين بالهيروغليفي.
والقصة بتبلّش من أوغاريت (على بعد 15 كلم شمالي اللادقية بسوريا بمنطقة إسما اليوم "راس شمرا") يللي كانت بعصرا الدهبي بالقرن 14 ق.م لمّن تم ابتكار الأبجدية الأولى فيا (1400-1300 ق.م) يعني هي يللي كانت أم الأبجديات بالعالم قبل أبجدية جبيل المعروفة بالأبجدية الفينيقية (1300-1000 ق.م).
وكل هالشي بسبب موقعا الجغرافي المهم يللي خلاّها تسير من أغنى مدن المنطقة، وبالتالي كان هالشي الدافع الأساسي يللي ساعدا تبتكر أول أبجدية مسمارية بالساحل الفينيقي، طبعاً من بعد الكتابة السومرية والآكادية (العراق اليوم). وهالأبجدية كانت تعتبرالأكتر شمولية وبتتشكل من 30 حرف وبدَورا سهّلت ومهّدت الطريق وفتحِتا أمام الأبجدية الفينيقية (أبجدية جبيل) بعدين. وسرّ أبجدية جبيل هو اختصارا بـ 22 حرف بدال 30 وبطريقة كتابتا يللي كانت على ورق البردي ومش عَ ألواح طين متل ما كانت الكتابة السومرية قديماً والأوغاريتية بوقتا، الأمر يللي خلاّها تكون أوضح وأسهل بالقراية والكتابة، وبعدين انتشرت بكل الشرق ووصلت لليونان وبعدين لكل العالم الغربي وطبعاً منا استخلصت كل أبجديات العالم.
تفسير ومعاني هالأحرف
- أ: "أولاف" بتعني التور بلغتنا الآرامية لأنو التور كان مؤلّه حيث كان رمز للخصب و القوة.
- ب: "بيث" بتعني مسكن/ عايلة/ مملكة/ مطرح/ معبد / مركز ....
- ج: "جومل" (ج بتنلفظ متل الطريقة المصرية) يعني جمل يللي كان وسيلة نقل مهمة بين مناطقنا والمناطق الصحراوية (العربية)
- د: "دولات" يعني باب / بوابة حيث كانت كل المدن إلا بوابات (مداخل)
- هـ: "هى" شباك / نافذة / كوّة / طاقة / فتحة
- و: "واو" الربط والوصل / وصلة / attach
- ز: "زين" سلاح، و بعدنا لليوم منقول العقل زينه، منقصد فيا العقل سلاح الإنسان.
- ح: "حيط" جدار / سور ... وهالشي لإلو علاقة بأسوار المدن ، وبعدنا لليوم منقول باللبناني حيط
- ط: "طيث" جنين، لأنو كان جنين المرا بمثابة الكيس يللي بيحمل الحياة وإلو علاقة بعملية الخلق وكانو يعتبرو الأم هي الخالق.
- ي: "يود" يعني اليد
- ك: "كوف" يعني الكف (كف اليد)
- ل: "لومد" يعني سهم الصيد
- م: "ميم" يعني المي (المياه يللي سرّ الحياة)
- ن: "نون" هي السمكة ... حيث كانت السمكة من رموز العبادات القديمة
- س: " سمكت" هي الحيّة ... وكمان كانت الحيّة من رموز العبادات القديمة
- ع: " عين" العين
- ف: " فى" الفم
- ص: "صودي" الصنارة ... من وسايل الصيد
- ق: " قوف" الإبرة
- ر: "ريش" الراس / القمّة/ البداية/ المقام الأعلى ... ومن أهم أمتالنا الشعبية: زمط بريشو
- ش: "شين" السن (أسنان الإنسان)
- ت: " تاو" إشارة / علامة
الأبجدية الفينيقية
