كرسي الأرِض ...
طَقْسا مَدا ... غَيَّم
تَـ الغَيْم عَصفو يِطْلَع مْعَلَّم
حِبَّيت جَوِّي سَمّْعو دَرسي
من غَيْم أوسَع ... ضايِع ... مْنَجَّم
وصرت أكتُب بالتَّلِج عُرسي
عا جَوّْ ... خَيَّط طَرِحْتِي ... وعَتَّم
دَقَّر طْرافا بالأرِض ... سَلَّم
عالأرِض ...
سَمَّك طَرْحِتا فَرشي
لـْ فَرشي عا كُرسي ...
نايْمِه ... وتِحلَم:
لـْ كُرسي بيـ قَلْبا تَلِج ... ومْعَرَّم
جَمَّد بـِ نُقْطَه الكون ... وتْحَجَّم
ناطِر خَبَر من هالشِّتي ... وْيِمْشي
غْطَيطَه وما قِشْعِت ...
دَعِستو دَغْشِي
مَغروم تارِك غَيِمْتو ... تْيَتَّم
مَأتَم بِكي بْـ لون الشِّتي مْغَشِّي
مْعَرَّم هوا ... !!!
تَلَّج معو ...عَضَّم
تاري التَّلِج بيدوب بِـ كَمْشي
كل ما انْغَرَم بالشَّمِس وتْألَّم
بيدوب عَضْمو بْـ طَقِّة لـْ مأتَم...
وْنَسمِة حِزِن كل ما الشَّمِس تِقْسي
في تَلِج قَعَّد دَمِعتو ... نَسَّم
وفي بْياض لونو دَمَّع ... تْبَسَّم
... والرِّيح عمـ تِرْتاح عالكرسي.