قيس نمر

دكانة لبيع وجهات النظر

3 دقائق للقراءة
السرفيس مدرسة الفلسفة الحقيقية بلبنان (صورة AI)

عم فكّر أفتح دكانة بيع فيها "وجهات نظر"... مش آراء، الآراء مجانية ورخيصة متل كيس البزر. وجهات نظر مفصّلة ع القياس:

يعني بدك تشوف الدني حلوة؟ منركّبلك قزاز أزرق مغبّش، بتصير تشوف المصيبة غيمة صيف وعابرة.

بدك تشوف الواقع؟ منقلك لأ، هون في خطر جلطة، وما منتحمّل مسؤولية عوارض صحوة الضمير المفاجئة!

مبارح التقيت بواحد مثقّف، من هول اللي بيحكوا بطرف لسانن، قاعد عم يشرحلي "أزمة الاغتراب عند الفرد المعاصر في ظل الحداثة المشوّهة"... قلتلو: "روّق يا عبقري زمانك، شو حداثة وشو اغتراب؟ إنت مغترب لأنو أجرة بيتك أربعمية دولار ومعاشك تلاتمية وخمسين، وهيدي بالرياضيات اسمها عجز، وبالفلسفة اسمها مأساة، وبالعربي الفصيح: انضب بالبيت وشراب شاي فلت بلا سكّر تا توفّر!"

الناس بتحب المصطلحات التقيلة تتبرّر خيبتها... إذا واحد فاشل بالحب، بيقلك: "عندي نوستالجيا للماضي ورهاب التزام"، ما بيقلك: "أنا بخيل وما بحب إعزم حدا ع منقوشة زعتر"، هيك برستيجو بيهبط! 

نحنا كائنات عايشة ع "الدفش"... بتفيق الصبح، بتطّلع بالمراية، بتقول لحالك: "شو بعدني عم أعمل هون؟". ما حدا بيجاوبك، لأنو حتى انعكاسك ع القزاز بكون عم يفرشي سنانو ومستعجل تيلحق السرفيس.

أما السرفيس، فهيدا هوي مدرسة الفلسفة الحقيقية بلبنان: أربعة ورا تلاتة قدام، الرِّكَب عم تدق ببعضا، والشوفير حاطط شريط تسجيل عم بيصرّخ فيه مطرب شعبي عن الغدر، بينما الشوفير نفسو عم ياكل عليك ربع ليرة بالفراطة!

هون بتفهم معنى "صراع الطبقات"... مش من كتب كارل ماركس، إنما من إيد الشوفير اللي ماددها لَوَرا وناطر تا يكسر عليك بالباقي.

بتعرف شو اللي بيضحِّك؟ إنو نحنا مقتنعين إننا شعب ذكي، شعب "فهلوي". شعب كل ما ينقطع فيه حبل، بيروح بيعقدو سبع عقد، وبيقعد يتمرجح عليه ومبسوط بنجاح التجربة... لحدّ ما يفرط الحبل ويوقع ع وجّو طب، بيقوم بينفض غبرتو وبيقول: "الحق ع الجاذبية، عين وصابتنا!". 

نحنا اخترعنا فكرة "بكرا أحلى"، وبيجي بكرا، بيقعد حدّ مبارح، وبيفرطوا ضحك علينا، وبيقلّو لمبارح: "شفت كيف بعدن ناطرين؟ خلّيهن، النوم مفيد للبشرة وللأعصاب!".

وهلّق... شو بدنا نعمل؟ ولا شي. منشرب قهوة تانية، منحطّ إجر ع إجر، ومنراقب كيف العالم عم يدور متل غسالة فول أوتوماتيك مصدّايي خربان موتورها... عم ترجّ، عم تعمل صوت، والميّ عم تشرشر من تحت، والكل ناطر الغسلة تخلص... مع إننا من الأساس، نسينا نحط صابون!

وبعد في حكي...