- ما هو سرّ علاقتك مع الوزير السابق محسن دلّول؟
محسن دلّول ابن منطقتي. أنا من تمنين التحتا وهو من علي النهري.
- تكتب مذكراته؟
قبل المذكرات بكثير. علاقتي معه تعود إلى السبعينات. كان قريبي عوض مرتضى في الحزب الاشتراكي من وجهاء البلدة وكان محسن دلّول يزوره. كنت صرت في الحزب الشيوعي ونشأت علاقة. وفي الحرب تكلّفت بمسؤوليه العلاقات السياسية بعدما عدت من روسيا عام 1988. كانت توزّعت قياده الحزب بعد اغتيال رشيد كرامي لأنّه صار هناك قلق من أن تكمل الاغتيالات. راح الياس عطاالله إلى موسكو وفاروق دحروج وكريم مروّة وآخرون قعدوا بسوريا وآخرون بفرنسا وأنا وغسان الرفاعي والياس الهبر وأديب بو حبيب بقينا في بيروت. أنا مسؤول عن العلاقات السياسية. غسان عن العلاقات الجماهيرية والياس الهبر وأديب بو حبيب مسؤولين عن النقابات. كانت تحصل نشاطات وكان محسن دلّول على علاقة مع السوريين. بدنا نعمل مظاهرة. مين في؟ علي حمّود كان عميد في المخابرات السورية في البوريفاج. كنت مضطرًّا أن أقابل محسن دلّول لنسهّل المظاهرات.
- علاقته كانت قوية إلى حد كبير مع النظام السوري
محسن أكثر حدا خبير بالنظام السوري.
- ماذا حصل بينه وبين أكرم (بيار رزق)؟ هو أرجعه إلى لبنان وهو كان سابقًا مسؤولا أمنيًا في «القوات»؟
أخبرني محسن أنّه قبل ما يفلّ بيار رزق من لبنان سنة الـ 91 بيتّصلوا المخابرات الأميركية بالمخابرات اللبنانية. قالوا لهم عندنا مشكلة في تعنايل بدّنا نحلّها بدّنا نبعت واحد هو يروح يحلّها. بقوموا بيبعتوا بيار رزق. بياخدو ضابط من الردع. لبّسوه بدلة رائد بالجيش اللبناني وبيروح مع هيدا الضابط من الردع وبرافقهم أحد ضباط المخابرات.
- راح معهم محسن دلّول؟
لا أحد ضباط المخابرات.
- اتصلوا بمحسن ليتّصل بالسوريين؟
ما كان وزير دفاع محسن. هيدي بالـ 91 المخابرات الأميركية اتّصلوا بالمخابرات. بيار خبّرها لمحسن قبل ما يكون وزير دفاع. راح معه أحد الضباط اللبنانيين إلى تعنايل وكان في جهاز تنصّت على ما يبدو حاطّينه هناك كلّفوه. راح صلّحو بيار ورجع. هيك خبّرو لمحسن. بعدين وقت اللي فلّ من لبنان، بتتّصل بالـ 94 سيّدة تعرف محسن وابنه نزار، من وجه الحجر من البترون، وتطلب مساعدته حتى يعود بيار إلى لبنان، لأنّ عنده ملفّ عند السوريين وفي المحكمة العسكرية. سألها أين هو؟ قالت في باريس. قال أنا في باريس خلّيه يحكيني وبشوفه. بيروح بيار بيتلاقى بمحسن في أحد الفنادق. سأله محسن: شو قصتك؟ قال له بيار: عاملنلي ملف تعامل مع إسرائيل. قال له: أنت تعاملت؟ قال له: شو بس أنا لحالي تعاملت مع إسرائيل؟ أنا بإسرائيل التقيت مع أكثر من مسؤول هلّق قاعدين بالحكم بلبنان. قال له مين؟ أعطاه أسماء. ما سمّاهم محسن معي. قال له: طيّب شو بدّك؟ قال له بدّي إرجع على لبنان. كيف بدّك ترجع؟ قال له: أنا بقدر فيد السوريين كثير. قال له: كيف فيك تفيدهم؟ بيقوم بيشيل صورة معه بفرجيه عليها لمحسن فيها وفدين سوري وعراقي عم يتفاوضوا. مخابرات يعني بيعرف منهم محسن حكمت الشهابي وعلي دوبا. وفي صورة بيار مع الوفد العراقي. قال له: شو عم تعمل أنت مع الوفد العراقي؟ قال له: أنا أشتغل مع جيمس بيكر (وزير خارجية أميركا 1990- 92) بقضايا الحدود بين المغرب والجزائر وبين السعوديه واليمن وبين العراق وسوريا. كلّفني جيمس باكر في هذا الموضوع. يعمل مفاوضات وأنا بشارك مع الأميركان والإسرائيليين. عندي علاقة بياسر عرفات، مع العراقيين. قال له محسن: شو عم تحكي؟ قال له: أنا عندي معلومات قد ما بدّك وبقدر أنفع السوريين. في محاولة انقلاب عم تنطبخ بسوريا يتزعّمها ضبّاط سوريون عم يجوا يجتمعوا بألمانيا وفي مضيفة طيران بالطيران السوري بتروح وبتجي على باريس وتنقل رسائل من جواسيس لإسرائيل بدمشق إلى السفارة الإسرائيلية في باريس، وهناك يتعاملون مع الضباط الموجودين في ألمانيا. خوِت محسن من هالحكي. قلّو: ما بقا تحكيني. خلّيني شوف شو بدّي أعمل. محسن بيحكي هالأمور كلّها لحكمت الشهابي. قال له: بلكي عم يكذب عليك. قال له: ما بعرف. إنتو تحقّقوا. قال له الشهابي: طيّب. بيقوم بيجتمع مع علي دوبا ومع محسن. رجع روى لهم محسن المعلومات. علي دوبا شكّك بالموضوع. بعدين بيبعت حكمت الشهابي إبنو على باريس. قال له: خلّي ابني يشوفو. راح شافو. حكى له بيار ما لديه من معلومات وعمل محضر وجابو لبيّو. طلع في شي مضبوط. بيقوموا بهالوقت بيكلفّوا ضابط سوري يتابع الموضوع. هذا الضابط بيجيب معلومات. بيكتشفوا أن خبرية الانقلاب مظبوطة. بيعتقلوهم بيقتلوهم. بدّهم يرجّعوا السوريين بيار على لبنان. شافوا إنو عنده معلومات مهمّة. قال لهم: أنا أخذت الـ (لاب توب) من بيت المستقبل وقد ما بدّكم في معلومات عن إسرائيل وعن الأميركان وعن وعن... فاعتبروه مخزون معلومات مهم لهم بدّهم يرجّعوه ويصيروا يتعاونوا معه. قالوا لمحسن، كان وقتها وزير دفاع، شوفوا كيف بترجّعوه. قال لهم: ملفّه في المحكمة العسكرية. قالوا له: عند مين؟ قال: القاضي وائل مرتضى. بيجي محسن بشوفه لوائل وشرح له القصة. قال له: أنا ما فيي هيدا عنده ملف تعامل موثّق فيه صوَر أنا ما بقدر أحملها. بيرجع محسن بيجمعو بغازي كنعان ليقنع غازي كنعان وائل مرتضى. ما قنعو. حاولوا يضغطوا عليه بلكي بيمشي الحال. بيقول محسن ضغطوا عليه ميشال الرحباني وجميل السيد إنو ما يقبل وائل مرتضى حتى ما ينكشف شو عملوا معه بالـ 91 وقت اللي بعتوه على تعنايل ورافقوه. بعدين بيكلّفوا بهالملف آصف شوكت. آصف صار مستلم ملف بيار رزق وتعرّف عليه وبيار عرّفو على المخابرات الفرنسيه وصار آصف شوكت شابك علاقات عبر بيار رزق مع المخابرات الفرنسيه وصار في شي عائلي وصار يرافق ميشال سماحة مع بيار رزق آصف شوكت على فرنسا ليشوف المخابرات الفرنسية. وبعتقد هذه كانت قصة كبيرة.
- كان لها علاقه باغتيال آصف شوكت في دمشق؟
أعتقد ذلك. صار في شكوك فيه أنّه رابط (مع المخابرات الفرنسية) ووقتها كمان حتى ميشال سماحة رافق بشّار الأسد بزيارة إلى فرنسا عقب هذه الفتره نتيجه شبكة العلاقات التي عملها له بيار رزق.
هناك أمر بعد. قرأت لك كتابك عن سمير جعجع وعن اعتقاله 4114 يوم. وعملت أنت حوار مع كثيرين ولكن لم تحاور محسن دلّول الذي كان وزير دفاع في تلك الحقبة. محسن روى لي ما ورد في مذكراته المكتوبة التي لم تنشر بعد، أنّه بعد اعتقال جعجع أرسل إليه إميل لحّود رسالة وكان قائد جيش يطلب فيها ترقية مدير المخابرات ونائبه على نجاحهم في العملية. رآها محسن ولم يكن فيها اسم جان سلّوم وضباط المكافحة الذين رافقوه في اعتقال جعجع في 21 نيسان 1994. لفت نظره إلى هذا الأمر وأرسل وراء ميشال الرحباني (مدير المخابرات) وقال له: كيف باعتين لقائد الجيش ليستة ما فيها اللي عملوا العملية؟ قال له: هودي بدّهم معاقبة. سأله: ليش؟ قال له: راح بدل ما يعنّفه عبطه صار يبوّسه. قال له: يخرب بيتكم هيدي لازم يتكافأ عليها لأنّه ما صار مشكل ولأنّه عبطو وبوّسو وجابو بالمنيح من دون ما نعمل دمّ.
- ربّما كان مطلوب ينقتل جعجع عند اعتقاله؟
حبيت خبّرك ياها. يا ريتك رحت عند محسن كان خبّرك تفاصيل.
- هو لعب دورًا كبيرًا في قضية اعتقال الدكتور جعجع خاصة بالوضع المتعلّق بسجن وزارة الدفاع وتشريعه
أخبرني عن هذا الموضوع أيضًا وقال لي إنّهم كانوا يقولون في الإعلام إنّ جعجع عم يتعرّض لمضايقات ومحطوط بمحلّ غلط. يحكي مع قائد الجيش العماد إميل لحود الذي كان يقول له: أبدًا نحن عاطيينه غرفة خمس نجوم تلفزيون وكتب وإلى آخره. وكان يكتشف أنه مش مضبوط.
لقراءة الجزء الأول من الحوار
لقراءة الجزء الثاني من الحوار
لقراءة الجزء الثالث من الحوار
لقراءة الجزء الرابع من الحوار
لقراءة الجزء الخامس من الحوار