كتابات تستحق النشر

لاجِئ

شويّ من خبز الاغنيا بيرجم الفقر كلّو وبيقطع نَسل الجوع…

المَركَب صليبو كان

عيونو بحر تاني… ما نسيو يلمَعو

وموجات دَمعو بْـ صخر خدّو يفقَعو

ومقداف كَفّو طعم للحيتان

ناطر هَوا يهزّ الصليب… يْوَقّعو

مخَزَّق عا قلبو شراع صَدرو… مصَقّعو

مخَزَّق مْن زْمان

وناطِر شي مَرَّه يغمرو انسان

يمكن الغَمرَه ترَقّعو…

ما كان وحدو من الفقر هربان

خْيالو مْبَطَّن كان

وكان الفقر هربان بخْيالو مَعو