كتابات تستحق النشر

ضَوّْ الفُقِر

يا قَشّْ قَمحَك شو بكي من الجوع

عالـ فُقِر غَطَّا حْرام قَشَّاتو …

لـْ فْقْرا اللي إكلو قَشّْ .. ما ماتو …

قَمُحُن بـِ سَهْل الجوع فَتّْ دْموع

تا ياكلو فْتافيت بَكواتو …

عا مْغارتَك يسوع لِم فاتو ..

ولاد القَهِر غَفُّوك تا دَفُّوك ..

بـِ قْعود صَبْرُن .. بالنَّوم قِشعوك ..

جايِب سما من رَبّْ نِجماتو

شو زغير مِتْلُن علـْ أرِض لاقوك ..

بِرشان جِسمَك ضَوّْ .. تا شَمُّوك

… ويْغَنّجو بالضَّو .. تـَ يْلَهُّوك ..

عَن قَصِر عَفَّن كلّْ خبزاتو ..

-وما في مَلَك ما مات فوقو مْلوك ..-

إلاّ إنت بَيَّك مَلَك زاتو ..

وجايِب مَلَك يَسوع عـَ حْياتو ..

عالقد فاقو طْفالَك يْصَلُّوك

عا قَدّْ جوعُن .. بالـ فِقِر هَجُّوك

وشو طاف صَوتَك طاف تا حَبُّوك

دَبدِب مَعُن عـَ ريش كِلماتو .

ولـَ مْغارتَك يسوع .. في مَريَم

كيف جابْتَك من فوق .. لـِ مْغَيَّم

من تَلِج نَزَّل غَيم لَهتاتو

تا ما يْضَلّْ تْرابْنا مْيَتَّم

ويِشرَب شتي من مَيّْ دَعساتو

وعَطْش الأرض ما يْضَلّ يِتألَّم

وْلادا خَليقا .. وماشيه بْـ مأتَم

مَريَم لـِ جَرِّت دَرِب صَلباتو

من حُكمُن المخروب .. ومْعَتَّم

وادَّيش في أحكام جَوَّاتو

عـَ ضْلوع كِزبُن جَلْدُن مْعَلَّم

وبيـ كلّْ جَلدِہ الـ كِزِب حَرباتو

ماتو قَهِر تا مَوتُن تْسَمسَم

وحِكَّامنا اللي عَدلُن مْقَسَّم

مِتلُن لـْ أخوَت صَرَّف خْواتو

لـَ الـجُّرِم يَاللي يَبَّس وحَصْرَم

دَمّو كفايِه .. عالحُكِم دَمَّم

"يوضاس" صَرِّف جُرمَك .. وهاتو

هَرّو مَصاري التِّين لـِ مْزَمْزَم ..

تـِيْن الـ خِيانِه .. تا قِدِر يِندَم

شَنَّق بيـ حالو رْقاب كَرماتو

قومو انْدَمو .. جايِه الطّفِل يِحلَم

قومو انْدَمو بـْ غِفران عِنباتو ..

قومو عصرو غفران وَجْعاتو

بالكَرِم حَسره .. والعِنَب زَوَّم

زَوَّم وَجَع .. كاس الوجع أرحَم ..

عَصْرِة نَدَم .. من دمّ كاساتو

-وج النَّدَم مسودّْ ومْلَتَّم -

….

ولـَ مْغارتَك يسوع .. في مَريَم

كيف جابْتَك من فوق لـِ مْغَيَّم

من رَبّْ بَيْبَت بالدِّني يسوع

وبيـ حِضن بيتو هالدّني تِسْلَم

….

يا قَشّْ قَمحَك شو بكي من الجوع

عالـ فُقِر غَطَّا حْرام قَشَّاتو …

لـْ فْقْرا اللي إكلو قَشّْ ..ما ماتو …

قَمحُن بـِ سَهْل الجوع فَتّْ دْموع

تا ياكلو فْتافيت بَكواتو .