عماد موسى

في حدا بدّو وحدا ما بدّو

7 آذار 2022

02 : 00

في اللي ما بدّو منك شي، وفيه البدّو كل شي.

في القادر يوفي الندر، وفي النادر ومش قادر.

في اللي بدّها وما حدا قدّها، وفي اللي عقلها على قدها وما في شي بيردّها.

في اللي بدّو يقبض وما في مين عم يدفع، وفي اللي بيدفع وما حدا قابضو جد.

في القوي اللي عندو حاصل، في اللي ما قادر يحصّل بنطلونو.

في نائب ثرثار وفي مرشّح

أبو منقار.

في حدا صاحب مشروع وفي حدا صاحب مرا بيندقلّها نوبة.

في اللي بيصرف من حساب غيرو وفي الـ "ما غيرو" المتموّل الكبير حاسب حساب الكل. كتّر ألف خيرو.

في حدا مع شعار "كلكن يعني كلكن" وفي حدا مع "تضربي منك إلو".

في الدجاجة الـ بتبيض من 30 سنة عالسكت وفي اللي بتقاقي من 15 سنة عالفاضي.

في حدا مصلحجي إنتهازي، وفي حدا مصلحة بلدو فوق كل إعتبار.

في مين العلقة معو علقة وفي مين عينو بلقة.

في تقيل الدم وفي الأتقل من التقيل.

في حدا بيفلقك بالوعود وفي حدا بيوعدك إنو يفلقك على أربع سنين.

في النازل من الجو متل المظلّي وفي الطالع من الأرض متل البزّاقة.

في قياس Small وفي Extra large.

في الـ بيوزّع أصواتو عالمحتاجين وفي الـكاسر إيدو وبيشحد عليها.

في حدا ما بيساوم وما حدا بالأساس عرض عليه شي.

في الممغوص وما بيحكي وفي الـ ما بيحكي وممغوص. حلّها بقا.

في عندهم مرشّح جربيدي وفي عنّا دكر جربيدي.

في اللي ما ضغط على مرتو وترك لها الحرية الكاملة تنتخبو وفي اللي حجز باسبور حماتو حتى تنتخبو.

في حدا بدّو وما فيه. وحدا فيه وما بدّو (تصلح جنسياً).

في حدا بيطلع على بالك تليخو كفين، وفي حدا بكف واحد بيعملك جدارية.

في حدا ما بيفهم الشعار بينتخبك وفي حدا بيفهم الشعار وبينتخب خصمك.

في حدا بزيت وحدا بسمنة.

وأيضاً في مرشّح ملوّح وفي مرشّح محروق وفي ناخب semi cuit.

في اللي ألله عاطيه وفي اللي ألله يساعدو.

في حدا عندو نِيّة وما عندو القدرة، وفي حدا عندو نَيّة وما عندو هبرة.