غرّد الكاتب والممثل طارق سويد قائلاً: « طيب خلص يبقو هني ذاتن الزعما اللي جربناهن تلاتين سنة وشفنا النتيجة، بس ما حدن يقول ما معي حق ربطة خبز وابني مات عباب المستشفى وما عم فيي اتوظف والسرطان والزبالة والامراض، طالما كل فريق الا زعيمو ما حدن يقرب منو، و زعيمو وحدو النضيف، بس وقفو تقتيل وتخوين وشر».
شدّدت الفنانة كريستينا صوايا على ضرورة الإتحاد تحت راية الوطن، وقالت: «خلينا واعين ومتحدين تحت علمنا علم لبنان وبس خلص قرفنا انقسامات وخروقات غير شرعية، بفتكر كلنا عم نعاني من نفس المشاكل والمصائب وعنا مطالب محقة وبدنا حلول جذرية ومساواة للجميع شو ما كان انتماء كل شخص أو طائفته، الثورة انطلقت ضد الشعارات الطائفية والحزبية ليش السعي لشيطنتها».
رأى الإعلامي يزبك وهبة عبر «تويتر» أنّه «في ظل الصورة السوداء التي نعيشها...إعلانات عن البلاك فريداي وعن فيلم جديد بعنوان يا نهار أسود... بدنا صورة فاتحة #يبقى_الأمل»، مضيفاً: « اللّهم نجّنا من الفتنة...لا نريد أن نتذكّر مشاهد الحرب وبشاعتها».
وجّهت الممثلة ريتا حايك رسالة الى أمهات عين الرمانة والشياح بالقول: «أمّهات عين الرّمانة والشّياح...إنتو الدّني!»
أشارت الإعلامية ناديا بساط الى أنّ «الحالات المُبكية التي تابعناها من احياء #طرابلس المُعدَمة مع راشيل كرم وألان درغام سبب كافٍ للثورة، وسبب إضافي لاحترام اهل الشمال ورُقّيهم في ساحة النور»، وأضافت: «#لبنان_ينتفض».
أكدت الممثلة باتريسيا قسيس شماس بحزم على «تويتر»: «لا مش رح نخاف لأنو الحق ما بيخوّف لأنو يللي عم نطالب في هو أبسط حقوقنا الإنسانية ما رح نسكت لأنّو الناس جاعت وولادنا خط أحمر لأنو إنتو جوعانين أكتر منا بس خنوعكن وتبعيتكن عم تنسيكن وجعكن وعم تسرق منكن إيمانكن بحالكن وأملكن بالتغيير وحق ولادكن بالعيش بكرامة».
طرح الفنان لوسيان بو رجيلي سلسلة اسئلة على مواقع التواصل الإجتماعي، وقال: «الطرقات مفتوحة بس عأيا أشغال بدنا نوصل؟
الشركات مفتوحة بس بأيا أموال بدنا نشتغل؟
المحلات مفتوحة بس بأيا بضاعة بدنا نتاجر؟
السلطة عم تخنق اللبنانيين وتحجز مدخراتهم وتتخاذل.
بوقت عدة نواب ووزراء بعدهم عم يكزدروا ببلاد العالم كأن ما في شي!!!#بكفي مماطلة قاتلة للبنان!».
#لبنان_ينتفض».
أكدت الإعلامية ريما نجيم عبر «تويتر»: «أنا من الشياح ابني تعلم بالحكمة عين الرمانة ، رفقات ولادي أكلو وشربوا وناموا عندي ، ما رح نقبل بيللي صار تسقط الغرف السوداء المخططة للفتن!»
غرّدت الإعلامية يمنى شرّي بحزم واندفاع: «لا بدي فساد يقتلني ولا بدي حرب أهلية تقتلني ولا بدي اسرائيل تقتلني واضحة أو منعيد؟» واضافت: «#لبنان #لبنان__ينتفض #الفتنة_أشد_من_القتل #قطع_الطرقات_جريمة #كلنا_لبنان #بدي_عيش_بكرامة». وفي تغريدة أخرى قالت شرّي: « وفي اليوم الثالث والأربعين .. بحبك يا لبنان».
