كتابات تستحق النشر لإبراهيم شحرور

كلْما انْدبَح عصفور...

02 : 00

الصيّاد قوّص جانح العصفور

العصفور ضلّ يْطير

ما هَمّو…

إمّو السّما

وْلو جانحو مكسور

رح يستعير جْناح

من… إمّو…

صابو بِمنقارو

وصار يْدور

حَوْلو…

تَ يوقع لحن ويْلمّو…

كف شكل

بدّو يسكت العصفور

وْغنّيْتو بْ قلبو

مشِ بْ تِمّو !

صابو بِ قلبو…

الدمّ صار يْفور

وْوقت اللي من دمّو

مسَح كِمّو

صار الفضا

ملعب رفوف طيور

عبّو السّما…

وْعا بعضُن الْتمّو…

من يومها

كلْما انْدبَح عصفور

بيخلّق بدل مِنّو

ألف عصفور

من كلّ نقطة دمّ

من دمّو…


يلفت موقع نداء الوطن الإلكتروني إلى أنّه ليس مسؤولًا عن التعليقات التي ترده ويأمل من القرّاء الكرام الحفاظ على احترام الأصول واللياقات في التعبير.