رأى المخرج ناصر فقيه عبر «تويتر» أنّ «يلّي بيستقيل لإنو سمع مطالب الثوار وقلبه عالناس، عالقليلة يحترم اول مبدأ بالثورة يلّي هو «لا للطائفية والخطاب المذهبي». التعصُّب يلّي عم منشوفوا اليوم بكورنيش المزرعة اسوأ بكتير من يلّي شفناه عالرينغ من فترة». وأضاف في تغريدة أخرى: «الكآبة ضـاربة الشعـب و الـ xanax فايت بالصلحة».
علّق الممثل بديع أبو شقرا على زيارة المبعوث الأميركي ديفيد هايل الى لبنان مغرّداً: «اصلاً انت شو جايي تعمل بلبنان؟ «دايفيد هيل» شو دخلَك بربّنا؟ خيّي من الآخر كل المصالح الدّوليّة والإقليميّة من الغرب للشّرق يحلّو عن****».
وأضاف: «#كلن_يعني_كلن #فنانون_من_الشعب #ثورة_الطلاب #القوّة_للناس #دايفد_حل».
علّقت الممثلة لورين قديح على الحملة التي تطاول الرئيس المكلّف حسان دياب وغرّدت قائلة: «يتساءل مراقبون، شو فيها اذا صبغ شعرو الرئيس المكلّف اسود مزرق ها؟ شو مصدر معلوماتكم ووين الفساد بالموضوع، هل بنيترات الامونيوم أو بالبارافينيلينيديامين ها؟ ما لقيوا شي يعيّب دماغو قام حطّوا راسن ببصيلات شعرو. تفاهة وفقر عقل ولتّ وعجن ما الو مثيل.» وأضافت: «نعم_لحسان_دياب».
رأت الإعلامية ديما صادق عبر «تويتر» أنّ «قبول حزب الله بحكومة تكنوقراط لدياب مقابل رفضه المطلق بإعطاء هكذا تعهد للحريري ليس له سوى معنى واحد: الحزب متأكد ان هذه الحكومة ستعطيه الولاء المطلق. انها حكومة حزب الله مجدداً. حكومة سبق لها أن فشلت فشلاً ذريعاً في السابق».
رأت الممثلة رولا حمادة عبر «تويتر» أنّ « آخر موضة كلما واحد بدو يصفّي حساباته مع واحد تاني بيحطها بضهر الشارع، انو يابا « تجاوباً مع مطالب الشارع»، وأضافت: «يخرب بيتكن شو تافهين وفاسدين وانتهازيين ومستفيدين ومتآمرين وطائفيين وخائنين ومستزلمين وتابعين #طلعوا_منها_بقى».
توجّه مدير شبكة قنوات mbc علي جابر الى المتظاهرين مغرّداً: «إنتوا الثورة الشعبية، انتوا القمر والنجوم، إنتوا الصبح إنتوا الشرف والحضارة، إنتوا الوعد والأمل والفخر. هم الماضي والإهانة. انظروا من هم؟ أي عيب وأي خيبة وأي مهزلة! إنتوا المستقبل الحقيقي، اصمدوا وثابروا. عينينا ترنوا اليكم يا من اعطانا سبباً للحياة وضوءً في آخر النفق. #لبنان_ينتفض».
غرّدت الإعلامية كارين سلامة إثر الأحداث الأخيرة في بيروت وقالت: «يللي صار من تكسير وتعدي على الممتلكات العامة والخاصة مش مقبول؟ يللي ما قبلنا شو صار بساحة الشهداء والرينغ مش رح نقبله هلأ،حق التعبير عن الرأي مصان بس الفوضى لأ».
لفتت الفنانة إليسا عبر «تويتر» الى أنّه «لما نرجع عشوارع طائفية بدل عناوين وطنية، يعني عم نرجع نفقد اللي جرّبنا نبنيه بالثورة.» وتساءلت: « ما صار الوقت نطلع من هالّلغة يللي كل ما انوجدت عند حدا، ضعّفتو بدل ما تقوّيه بوقت الشعب صار بمحل تاني كليا؟»
