ألو تقلا، وينك غايبة عن السمع؟
غاطسة بورشة ببيتي، والإنترنت بالمنطقة ضعيف، لهيك صعب إنكمش.
بس الهيئة بتكمشي وبتابعي كل الأعمال، لأنو قالوا إنك من النجمات القلال اللي بيفرحوا لنجاح غيرن. ثقة بالنفس؟
- مش قصة ثقة بالنفس، قصة إنو الفنان الحقيقي بيعشق الإبداع والجمال، وما بيقدر ما يفرح للعمل الحلو. أنا ما بقدر شوف شي حلو، وما تلفن وهنّي وعبّر عن اللي جواتي. بس أنا مؤخراً فاتحة ورشة ببيتي، لهيك ما قدرت تابع كل الأعمال، و يمكن كون مقصّرة تجاه بعض الزملاء الفنانين اللي قدّموا أعمال مهمة بموسم رمضان وما قدرت اتّصل وهنيهن.
قالوا كمان إنك النجمة اللبنانية الأولى عربياً وبأدوار أولى رغم إنك مش jeune première. شو سرّك؟
هنّي قالوا، يعني هنّي قالوا. دخيلك يا جوزيفين، ما تقوليني شي أنا ما قلتو. هلأ إذا هيك شايفين، هالشي بيفرّحني. أنا من أول مسيرتي كنت إعتبر أي دور هو أهم دور. حتى لو كان عندي مشهد واحد كنت أعتبر إنو أهم مشهد بالمسلسل. يمكن هيدا هو سرّي.
قالوا ليلى الضاهر بـ»عروس بيروت» وراحيل بفيلم «مورين» أهم دورين بمسيرتك. بتوافقي؟
ما في شك ليلى الضاهر شخصية مهمة وانطبعت بأذهان الجمهور العربي. وشخصية رحيل جديدة بمسيرتي الفنية. هالقول بيفرّحني لأنو إعتراف بنجاحي بآخر أعمال طلّيت فيهن عالجمهور. بس ما بوافق إنن الأهم بمسيرتي. في كتير أدوار غيرن.
قالوا إنك من الممثلات القلال اللي ما بتلجأي لتقنيات التجميل. مجدداً ثقة بالنفس أو خوفاً من تجميد تعبيرات الوج؟
الأكيد هو خوف من إنو يبطّل وجّي يترجم أحاسيسي. التجميل بالنسبة للممثلة كتير دقيق، ومش لازم تكون وجه لا يشوبه أي شائبة متل بغير مهن. وكمان أنا كتير خوّيفة، ما بتحمّل فكرة إبرة عم تنشكّ بوجّي. وطبعاً في ثقة بالنفس. بشرفك أنا مش جميلة يا جوزيفين؟ ما بحسّ العمر عم بيخسّرني الجمال، وبشكر الله على نعمة تقبُّل حالي متل ما أنا ومع العمر وبكل الظروف.
جمال المرأة إلو علاقة بالرجل كمان، لهيك اسمحيلي قلّك قلال الرجال اللي بيدعموا زوجاتن. زوجك المخرج والكاتب طوني فرجالله شو وضعو؟
دعم الزوج لزوجته الفنانة، أمر أساسي وجوهري وبيساعدها بمسيرتها وبيخليها تبدع وتتألق. أنا بشكر الله أنو زوجي من الداعمين جداً للمرأة، وبعتبر هويتي الفنية تطوّرت بفضل طوني فرجالله المخرج والكاتب والزوج والحبيب.
