كلّنا متّفقين إنو الحب هو أكتر إحساس "فنتاستيك" بالحياة، بس مين الأكتر رومانسية والأقل تطلُّباً بمسائل الغرام؟ المرأة طبعاً! فرغم إنها متّهمة بأنها الأكتر مادّيةً وحبّاً للهدايا الغالية، إلا إنّو المرأة ما بدّا غير شوية إهتمام و… إليكم الدليل.
فيروز غنّت "أنا ما بدّي هدايا حرير، وإسوارة عيدية، بدّي من عشيّة نقعد بالسهريّة، وصوتك يضحك ملوى البيت ويضوّي إيامي". وإليسا قالت بأغنية العقد "الحب دلع وونس وإني ألاقيك، مش بالهدايا وكفاية كنت أبقى ليك، طلباتي كانت بسيطة، عملت إيه؟"
سينتيا كرم
بدّكن براهين أكتر؟ بتعرفوا شو أحلى هديّة تلقّتها الممثلة سينتيا كرم من حبيبا؟ ما رح تحزروا. "حبيبي بحدّ ذاتو. بمجرد ما عطاني قلبو وثقتو، عطاني أحلى هدية بالكون". وبحال حسّستوها ما كتير قنعتكن هالهدية، رح تجاوبكن: "وحياة الله أنا هيك، القصص المادية ما بتعنيلي. الهدية دايماً حلوة، بس بالنسبة إلي، لمّا حبيبي يكتبلي مثلاً، بصير صرّخ قد ما بنبسط". أكتر أغنية عاطفية بتحبّا؟ أكيد مش أغنية فيروز "ردتلو مكاتيبو و ردلي مكاتيبي". سينتيا بتحبّ "بلا ولا شي، بحبّك" لزياد الرحباني..."بموت فيها". حتى أحلى فيلم عاطفي عندا "Me Before You"، بيموت فيه البطل، فسينتيا اللّي بتحبّ الحبيب يكتبلا، بتحبّ فيلم، مش رح ينكتب للبطليْن فيه يعيشوا سوا.
كريستين شويري
إذا سينتيا بتحبّ حبيبا يكتبلا، أجمل هديّة حبّ تلقّتها الممثلة كريستين شويري هيي… كلمة! معقول كلمة "بحبّك"؟ "nooo، ما رح تعرفيها وما رح قلّك شو هيّي"… أجمل أغنية حبّ عندا؟ لأ، مش "كلمات ليست كالكلمات" لماجدة الرومي، ولا "paroles" لداليدا. حتى أغنيتها المفضّلة فيها كلمة "كلمة"، وهيّي "Sorry seems to be the hardest word" لإلتون جون. كريستين الرومانسية ناقشة كلمة "حب" على عنقها، وأفلام الحبّ المفضّلين كتار، أوّلن "Hachi"… "مزبوط، من بطولة ريشارد غير وكلب. ما في حبّ حقيقي ومجاني متل حبّ الكلب لصاحبو. هالكلب انعملّو تمثال لأن ضلّ ينطر صاحبو بعد وفاتو. شو بدّك أكتر من هيك حبّ".
تقلا شمعون
إليسا غنّت "عبالي حبيبي عيش حدّك عمر أو أكتر، وحبّي يكبر كلّ ما نكبر". هالأغنية بتشبه حياة "سيّدة الشاشة" تقلا شمعون مع زوجها المخرج طوني فرج الله. "الحبّ مش محصور بيوم لنعيّد فيه. الحبّ رحلة عمر، بيزيد وبيكبر مع الوقت والخبرة و… برّات طوني ما في حبّ. الحبّ إنك تقولي كلّ يوم للحبيب إنت نصّي التاني وبلاك ما فيني عيش".
أمّا الهديّة فمش بقيمتها المادية، "لأن أكبر هديّة بتروح رهجتها لمّا تبلّش المشاكل بين الثنائي". لهيك أحلى هديّة تلقّتها تقلا من زوجها هيّي"الأمان والإحساس بالراحة معو، وإنّي بين إيديْن أمينة، وإذا مرضت و ختيَرت ، في حدا بحبّو بيحبّني وممكن إستند عليه". الأغنية اللّي بتعبّر عن حبّن لبعض هيّي "ولدتما معاً و تظّلان معاً"، لأن "نحنا منآمن إنّو ما فينا نكون لغير بعض والحياة مش بس هون عالأرض، لهيك الحبّ بيستمر للعالم التاني. من سنتين، لمّا جدّدنا عهودنا بالذكرى 20 لزواجنا، أختي رتّلتلي هالأغنية، وأنا كتير تأثّرت وبكيت لأنها بتعبّر عن كلّ شي أنا بعيشو مع طوني".
ميرڤا القاضي
الممثّلة والمغنّية والنجمة الإستعراضية ميرڤا القاضي بتفضّل أغنيات عاطفية فيها تجربة حياة متل "Fini, la comédie" لداليدا. "كتير حقيقيّة هالأغنية، بتزعّل شوي بس هيدي الحقيقة". بتحبّ كمان "Que je t'aime" لجوني هاليداي، و "City of Stars" اللي بتغنّيها وبتعزفها عالبيانو، وهيّي من فيلم "La La Land" المفضّل عندا، هوّي وفيلم "The Notebook". أحلى هدية حبّ تلقّتها ميرڤا؟ لأ، مش عقد ألماس ولا جزدان "Hermès"، "أحلى هدية حبّ هيّي حبّ الجمهور لشغلي ولإستعراض داليدا اللّي قدّمتو، ولاقى استحسان كبير، والناس بعدا متشوّقة ترجع تحضرو. تقدير الناس أحلى هديّة حبّ".
بياريت وسلمى: أم ڤالنتينا
بعد بدّكن أمثلة عن رومانسيّة المرأة؟ النجمة سلمى حايك تزوّجت أحد أغنى رجال الأعمال بفرنسا، بيوم "عيد الحبّ" سنة 2009. ولمّا سألوها شو أحلى هديّة قدّملك ياها، جاوبت "بنتي ڤالنتينا". مِتلا الممثّلة اللّبنانية بياريت القطريب سمّت بنتا "ڤالنتينا"، بس بياريت ما بتحصر إحتفالا بالحبّ بيوم محدّد. "أنا مش من جماعة "سان ڤالنتان"، و بحتفل بالعيد بس لأنّو عيد شفيع بنتي".
