"صرْلي عُمُر عم بشتغل ناطور
ناطور بيت… بْ آخر الْغابِه
مهجور عم يتْونّس بْ مهجور
فلّو صحاب البيت… وصْحابي
مشتاق عَ الْقرميد تلفي طْيور
وْغيمِه تمسّح دمع مزرابي…
بابي مِنِ غْصون الشجَر محفور
ناطر يِجي بالصيف شي عصفور
تَ يْزور بيتو… يْدّق عا بابي…
بنطُر هَوا أيلول يلفح آبْ
بْتمرق النسمِه بْقلّها: فُوتي…
ناطر حدا تَ يْدِقّ عا هالْباب
ناطر حدا تَ يْدِقّ عا شي باب
وْمعليْش لَو عا باب تابوتي… "
