بونجور حبيبو. وين ما عم ن see you؟
بونجورين حبيبو. لأ، من اليوم وبالرايح رح من see you. انشالله برمضان الجايي في عمل جديد، بس بعد ما توضحت الامور. المشكلة إنو الممثل بلبنان صار عندو موسم واحد وبعدين بيقعد ينطر الفرج. الفنان لِ متلي، بيعيش بس من الفن، كتير عم بيلاقي صعوبة إنو يكمّل. الحمدالله إنو برمضان، أنا بشتغل مع شركة «ايغل»، وهيك بقدر استمر كم شهر.
يعني انتي من لِ بيقولوا وضع الممثل اللبناني صعب؟
صعب كتير وبيشبه لبنان، ولازم يلتقالو حلّ. الفنان، إذا مش موظف وما عندو كل آخر شهر معاش، حتى لو 100 دولار، كيف بيعيش؟ أنا من الأساس ما تعوّدت أعمل تنازلات، لهيك صعبة إني عيش من الفن وبس. كان عبالي اعمل شركة انتاج للدوبلاج حتى إضمن آخرتي، بس الشركاء ما طلعوا قد كلمتن.
قالوا إنو مسيرتك تأخرت بفترة من الفترات. بتندمي على الوقت لِ مرق أو بتقولي « كل شي بوقتو حلو»؟
نحنا ببلد، كل أحلامنا تأخرت، مش بس مسيرتي الفنية. بس إيماني بربّي بيخليني قول متل ما قلتي «كل شي بوقتو حلو».
قالوا كمان صوتك حلو متل خيّك النجم ربيع الخولي لِ اعتزل الغناء واصبح راهب. ليش ما دخلتي عالم الغناء؟
ما بلاقي حالي أبداً بعالم الغناء، مع إنو إجاني عرض من المرحوم طوروس سيرانوسيان، منتج زمن العز بلبنان ومتعهد اكبر الحفلات. يومها قلتلو بدّي فكر، ولما رجعت عالبيت، بيقلي خيّي طوني (ربيع الخولي) «شو؟ بدك تعملي مطربة»؟ نقزت، واستغربت كيف عرف. يمكن طوروس حكاه. المهم، طريقة سؤالو حسستني إنو مش كتير محمّس للفكرة، خصوصاً إنو عالم الغناء كان صعب بهيديك الفترة، فجاوبتو» لأ، أنا بحب كون ممثلة». طبعاً ما ندمت، لأنو خيّي كان بدو مصلحتي وأدرى مني بهالمجال، وهو لهلأ سند معنوي كبير إلي. التمثيل هو عالمي الواسع وخصوصاً إنو أنا ابتديت بالمسرح.
قالوا ايفون ب «للموت» اكتر شخصية علقت بذاكرة الجمهور. أيا دور بتعتبريه الأهم بمسيرتك التلفزيونية؟
كل دور قدمتو كان مهم بالنسبة الي، والاحساس بيشبه طفل عم يخلق. بس أنا بحب الادوار المركّبة لأنو بتخليني اشتغل عحالي وما بتكون بتشبهني. «ايفون» ما كان الجمهور شايفني بمثلا. انا خجولة بطبعي، والشخصية وقحة، بس نص ندين جابر وشغل فيليب اسمر عليي، خلاني اتخطى خجلي واطلع من حالي. كل مكونات المسلسل كانت عظيمة، وهالشي خلاه ينجح، وانا كمان انجحت معو.
مبروك النجاح، بس خلينا نحكي عن الخسارة. بيقولوا الخسارة ما اسما خسارة طالما رح بتعلمنا درس. شو لِ خسرتيه وبتعتبريه ما بيتعوّض؟
خسارة حدا من عيلتك، خسارة ما بتتعوض. انا خسرت ولادي التوم قبل ما يخلقوا، وخيّي سليم، والماما من سنتين، والبابا توفى بين ايديّي لما كنت بال 19، يمكن لهيك تزوجت شخص اكبر مني بكتير. كنت عم دوّر عصورة البيّ لِ خسرتا بكير. وبالحياة، اذا بتدعسي دعسة ناقصة، بتخسري عمر بحالو.
ع سيرة الدعسة الناقصة، بتقول اغنية «دشش»: شطب حبيبي شطب، الحب من حياتي انشطب. تزوجتي من الممثل محمود سعيد، وما عدتي كررتي التجربة. ليش انشطب الزواج من حياتك؟
ما بقى عندي ثقة بهالمؤسسة. شركة فاشلة جداً مش شوي، وهلأ it’s to late، خلص. بس قبل خفت إرجع عيد هالتجربة. مش زابطة، ما بحبا. بكرها.
