مرحبا إلسا. يا عمّي وين غاطسة إلك فترة؟ آخر أعمالك كان «ما فيّي»، والجمهور ما في على غيابك، وعم بيقول إنو اشتقلك.
والله وانا كتير اشتقتلن. للصراحة السنة الماضية انعرض عليي أعمال، بس ما كتير استهوتني، لهيك بعدت. بس انشالله هيدي السنة يكون في شي حلو.
حلو، لأن قالوا انك رح بتشاركي بدور أساسي بمسلسل «ع أمل» من انتاج «ايغل فيلمز» وكتابة ندين جابر وبطولة ماغي بو غصن. في أمل تكشفيلنا شوية تفاصيل؟
صحيح، في عندي مشاركة بالمسلسل، بس ما بقدر كتير أحكي تفاصيل لأنو بعدنا ببدايات القراءة. فانشالله soon منرجع نحكي لمّا نبتدي بالتصوير، وبيصير فينا نصرّح عن شوية معلومات.
قالوا إنك لفتّي نظر صانع النجوم الراحل سيمون اسمر اللي اختارك لتقدمي «ستديو الفن 2009-2010». شو اكتر شي لفتو فيكي؟
سيمون اسمر مش بس صانع النجوم، هو كان مبدع بكل ما للكلمة من معاني. أنا كتير ممنونتلو على إختيارو إلي لقدّم آخر موسم من «ستديو الفن»، البرنامج لِ حامل على كتافو كتير سنين وكتير نجوم ونجاحات. حسب ما قال لي الاستاذ بوقتا، اللي لفتو فيّي هي سرعة البديهة. أول تواصل بيناتنا كان على التلفون، يعني لفتت سَمَعو بالاول، ومن ورا ردّي، قرر يشوفني ويعملّي كاستينغ. بوقتا شبّهني بهيام أبو شديد، وحَبّ إنو أنا تلميذة مسرح، لأنو «على قوّلتو» لِ دارسين مسرح، كيف ما بتكبّن بيجوا واقفين، يعني إذا صار في غلط على الهوا، دغري منقدر ندبّر حالنا.
كلنا منقول إنك كنت ناجحة كتير بتقديم «ستديو الفن». ليش ما عدتي تجربة تقديم البرامج؟
للصراحة مش أنا اخترت، بس للأسف ما عاد إنعرض عليي برامج حلوة خرج قدّمها على قدّ مستوى «ستديو الفن». شاركت بتقديم برنامج «تاراتاتا»، بس من بعدا ما انعرض عليي قصص عليها القدر والقيمة.
عَسيرة التقديم، قالوا عم بتقدمي نصايح اليوم من خلال فيديوات عبر السوشل ميديا. شو قصة هالفيديوات؟
هالفيديوز مش نصايح، بقدر ما هني «تنكيت» على الوضع اليومي لحالة الناس. نهفات عم تقطع، وحلو الواحد يحط بسمة على وجوه العالم لما يشوفوكي عم تحكي. هيك طلعت الفكرة براسي وحبيت أعملها، بما إنو أنا عندي platform، فقلت ليش ما بستفيد منها، ومنِضْحَك شوي. مع إنو في بعض المواضيع عم بيزكزكوا بعض الناس، بس عم يقطعوا بطريقة طريفة لأنو بالنهاية مش قاصدين حدا معيّن.
في مين عم بيقول إنو هالفيديوز تعويض عن غيابك عن جمهورك. إنتي شو بتقولي؟
أبدا مش تعويض عن غيابي عن الجمهور. التمثيل شي، والسوشل ميديا شي تاني كليّاً. أصلا أنا متواجدة بشكل دائم على السوشل ميديا من أول ما فتحت صفحتي على انستغرام.
طيب، بما إنو كتار قالوا إنك مهضومة كتير بهالفيديوز، ليش بعد ما شفناكي بأدوار كوميدية بالمسلسلات التلفزيونية؟
يعني، في ناس عم بيحبّوا وفي ناس لأ، بس الأغلبية عم بيلاقوهن مهضومين. إنشالله يكونوا فتحة باب للشق الكوميدي اللي فيّي، لأنو في كتير عالم بيشوفوني بس بالادوار التراجيدية يلّي بتبكّي وبتيئِّس ويلّي ما بينعرض عليّي غيرا. بس انشالله قريبا يكونوا هيك باب لقصص طريفة بتشبهني.
منقول «عَ أمل» يعني؟
منقول.
