Allo وقالوا... مع باميلا الكيك

هاي باميلا، وألف مبروك نجاح «كريستال» لِ مكسّر الارض.

مرسي كتير، وانا كتير مبسوطة لأنو تعب كل فريق المسلسل اترجم نجاح كبير.

قالوا انو شخصية عليا بكريستال، من اجمل ادوارك. برأيك هو أجمل ادوارك؟

ايه ولأ. اذا بتسأليني عليا من اصعب الادوار لِ قدمتا؟ بجاوبك ايه. وهل اخدت شقفة من روحي؟ ايه، وكنت مبسوطة لأنو كنت عم حس معها وفيها. عليا شخصية انوشمت «تاتو» على قلبي وصار عندي ضعف على أي شخص اسمو عليا، وأي حدا اسمو باسل قوام بيفوت ع قلبي. عليا اكيد من اجمل ادواري، بس مش أجمل دور.

وأي دور هو الاقوى؟

ما بنسى بداياتي بأدوار «عصر الحريم» و»سارة» و»جذور» لِ عمل ضجة كبيرة. وفي ادوار صعبة ومركبة اكتر من دور عليا، متل تغريد المتوحدة بفيلم «بالصدفة»، لِ حضّرتلو 4 سنين وهو من اجمل الادوار ع قلبي وروحي، وريم النورية المكتومة القيد ومعها ايدز بـ»سمرا». ما بيستهويني عادة الدور الكبير بمشاهده، لأنو حلو المشاهِد يشتقلي. بحب طل أقل والصحافة انتقدتني إني باخد ادوار تانية، وكل جوائزي عن الدور التاني، بس بحب هالادوار، لأنها صعبة ومركبة عادة. دور البطلة المظلومة أو عندا خط وإحساس واحد، ما كتير بيعنيلي قدّ ما إني لوّن بالأدوار الصعبة.

ذكرتي «أجيال»، وفيه قدمتي دور كاتبة سيناريو. قالوا إنك اليوم كاتبة مسلسل رح ينعرض على نتفليكس. مزبوط؟

من وقت أجيال، بحس أنا مش بس ممثلة، وفي كتير جوارير براسي بحب شاركن مع العالم. كل انسان بيسعى يكون عندو بصمة أو رسالة، وبيتطوّر مع الوقت. اذا عم بتوَجّه اليوم للانتاج والكتابة والاخراج، لأن حسيت صار عندي شي قولو بعد كل هالخبرة كممثلة، وبحب حط بصمتي ورا الكاميرا أو بالنص. توجّهي اليوم هو ضو جديد من الاحلام الكتيرة اللي انشالله بحقق 5 من الـ 100الموجودين.

شو بعد فينا نقول؟ مش بس بتمثلي وبتكتبي وبدك تتوجهي للاخراج، كمان صوتك ورقصك حلو. غنّيتي بديو المشاهير وقدمتي دور راقصة بعدة مسلسلات. معقول هالمؤهلات ما يتم استغلالها بعمل استعراضي؟

الحمدالله في وزنات كتار من ربّنا بشكرو عليهن. عندي voix juste، وقدّمت الفن الاستعراضي «برودواي شو» من كم سنة، وغنيّت ورقصت، وكان معنا اوركسترا 25 عازف، ورجعوا ميرفا قاضي وسينتيا كرم وفؤاد يمين عملوا «شيكاغو بالعربي». بمجال الفن نحنا مش محطوطين بإطار واحد. ما في ممثل يقلك انا ما بركب حصان، ما عندي ليونة جسدية، ما بشتغل عنفسيتي. لازم نضلّ نشتغل عَ حالنا لنتجدد ونتألق وينقلّنا برافو. بدك تزرعي لتحصدي النجاح.

قالوا انك صريحة وحقيقية بمجتمع ما بيتقبّل الصراحة. مين لازم يتغيّر؟ إنتي أو المجتمع؟

أنا عم بتغيّر كل ثانية تحت ثوابتي ومبادئي وأخلاقياتي. أما صراحتي فأنا عم غذيها أكتر بس مش لحد أوصل لدرجة الوقاحة، أو مسّ بشرف أو كرامة حدا. مبدأي نصائح بناءة، وبتمنى حدا بينصحني نصائح بتساعدني إتقدّم واتعلم. مش رح بطِّل صريحة، والمجتمع مطلوب منو دايماً يتغيّر ويتطوّر حتى نقدر نعيش كلنا بايجابية ونقدر ناخد ونعطي.

أخيراً، قالوا بحال جبتي ولد، حابة تسميه عمر. شو قصة عمر؟

- كتير بحب هالاسم، وأصلاً بالتصوير الكل بيعيطولي «أم عمر». ما بعرف ليش بحبو، ومتل ما قلتلك إنو اسامي عليا وباسل هنّي الاحب على قلبي اليوم، اسم عمر من زمان آخدلي قلبي.

• باميلا الكيك