حوزيفين حبشي

ALLO وقالوا... مع ريموند عازار

18 تشرين الثاني 2023

02 : 01

بونجورك ريموند. قالوا انك درستي التمثيل بس بداية مسيرتك الفنية تأخرت. ليش؟

صحيح، درست التمثيل بمعهد الفنون، وتخرّجت سنة 1987. وخلال فترة دراستي، إجاني عروض لشارك بمسرحيات، مع آلان بيليسون ومع انطوان ولطيفة ملتقى، بس كان في رفض قاطع من الوالدة. الست جوزيفين رفضت إنو مثّل. أصلاً أنا فتت عالمعهد وهي ما كانت راضية ابداً، وكانت تقلي «ما عنا بنات يمثّلوا». ولمّا تخرّجت، تزوّجت بعد كم جمعة وسافرت عشت بباريس. واشتغلت مع زوجي بمجال تاني كلياً، بالسفارة الكويتية. غبت شي 7، 8 سنين ورجعت، وقلت لزوجي بدّي ارجع للـdomaine اللي بحبّو. قال لي إعملي اللي بدّك ياه. وفتت عَ عالم التمثيل، واتعرفت على البير كيلو اللي عرض عليي مسلسل «شارع الكسليك»، وبعدو «من يوم ليوم». وساعتها أمي قالتلي: «اسطفلي، جوزك بيقرر مش أنا، بما أنك تزوّجتي».

بس قالوا البداية كانت من خلال الدوبلاج. مزبوط؟

مزبوط. وقت رجعت من باريس، شفت كل اصحابي الممثلين عم يشتغلوا دوبلاج مسلسلات مكسيكية بالـLBC. وبما إنو كنت حابّة كمّل حلمي، بلشت دوبلاج.

أي مسلسل مدبلج بعدو علقان بذاكرتك من هيديك الفترة؟

مسلسل «خوان الغول» اللي كان كتير معروف بوقتا، ولعبت دور «اسوسينا».

وبعد الدوبلاج كرّت سبحة المشاركات بالدراما. بس الناس والنقاد قالوا انك تميّزتي بشكل خاص بالمسلسل المحلي «والتقينا» والعربي المشترك «الثمن». بالنسبة إلك أي مسلسل هو الأهم والاقرب لقلبك خلال مسيرتك؟

ما بعرف ليش النقاد بيتوقفوا بس عند هالعملين، مع إنو من اوائل مشاركاتي بالدراما، مسلسل «ورود ممزّقة». ولليوم العالم بتحضرو وبتقلّي «كنتي رائعة». في اعمال تانية كتير مهمة، والاقرب لقلبي اضافة لـ»الثمن» و»التقينا»، مسلسل رائع اسمو «وعيت» انعرض عمنصة «شاهد»، وكمان بحب دوري بمسلسل «دور العمر» لسعيد الماروق بدور أم سيرين عبد النور اللي شاركت معها بمسلسل تاني بحبو كتير هو «دانتيل».

ع سيرة الأم، قالوا انك قدّمتي دور الأم الحنونة اللي بتخبي حزن بعيونا بمعظم أعمالك. مش طالع عبالك تقدمي ادوار مختلفة؟ إمرأة قاسية يمكن؟

بتمنى إلعب غير الدور اللي لابستو، أو plutôt اللي ملبسينّي ياه. هالدور علّقني فيه المخرج ايلي حبيب. كان عم يعمل مونتاج مسلسل «اوبرج» من كتابة هيام ابو شديد، وكان دوري طانط من طانطات الاشرفية. اتطلع بعيوني وقال هيدي هي اللي رح تلعب دور إمها لنادين الراسي بمسلسل «لولا الحب». قالّها: نقيتلك ممثلة بتشبهك وخرج تلعب دور أمك. حبّني كتير وقال لي عيونك دبلانين حزينين، اكيد بيلبقلك كتير بدور الأم. ومن وقتا، مشي عليي دور الام الحنونة والحزينة. لهيك اكيد بتمنى آخد غير ادوار، دور شريرة أو أي شخصية مختلفة عني.

كمان عَ سيرة الامومة، قالوا انك بتعتبري نيكولا معوض متل ابنك، خصوصاً من بعد ما لعبتي دور والدتو بمسلسلين: «اميليا» و»الثمن».

حبيبي نيكولا معوّض. وما فيّي قول نيكولا معوّض من دون حبيبي. إيه بعتبرو متل ابني، وبحنّلو كتير،

ووجعني قلبي كتير عليه بـ»الثمن» لأنو كان في معاناة مرض.

بمسلسل «الثمن»، قالوا انتي مش بس ربحتي ابن، واخت كمان. مين هالاخت؟

- «الثمن» كان تجربة رائعة، وربحت فيه كتير اصحاب. أصلاً كل اللي مثلت معن، صرت اصحاب معن. بس بتعرفي، اللي من عمر بعضن بيحنّوا على بعضن، لهيك أنا ورندة كعدي كنا كتير اصحاب، واليزابيت اللي كان دورها مدبرة منزل رندة كعدي. وكمان الممثلة صباح الجزائري كانت متل إخت إلي.