بونجورك رولا. بلَّش نهارك؟ لأنو شكلي عم بحكيكي بكير.
طمني بالك، بلَّش بلَّش، مع بنتي اكيد ببلّش بكير.
بنتك كايلي لِ سنانا فرق متل فانيسا بارادي وعمر الشريف. بتقولي ناويي بالمستقبل تصير فنانة متلن ومتل الماما؟
تقبرني بنتي، وسنانا الفرق، لا فانيسا بارادي ولا عمر الشريف. بنتي كلها على بعضها سُكرة، بونبونة، وكل يوم بتسنّ سنانا لتعمل شي. يوم ممثلة، ويوم معلمة مدرسة، ويوم بدّا تساعد الفقرا. شو بدّك mom؟ انتي اعتمدي لنحنا ندعمك. عَ كل حال بعدا زغتورة عمرها 7 سنين، بس بتبلشي تشوفي شوي من الكاراكتير كيف عم يركب. بتتوضح القصة عادة بالعمر الصغير، بس عند بنتي ما عم تتوضح بعد. عادة، عندا وقت، شو ورانا؟؟؟
يعني اللي قالوا «طب الجرة ع تمها بتطلع البنت لأمها» ما غلطوا. على اساس ابتديتي اعلامية ومذيعة بتلفزيون المستقبل، وإذ انتقلتي للتمثيل. ليش بقى؟ ومعقول بالمستقبل ترجعي لتقديم البرامج؟
هلأ ما بخبي عليكي اني ابتديت بالتلفزيون مذيعة، بس الانتقال للتمثيل ما إجا من عبث، لأنو من انا وصغيرة بحب ألعب شخصيات، ومثّل وقلّد واحكي و»إرغي» كتير، وهيدا الـdomaine فيه حكي، إن كان التمثيل أو الاعلام. بس أنا ما تركت الإعلام. إذا انوجدت فكرة اوريجينال أو برنامج حلو، رح تلاقيني رجعت.
لنرجع للتمثيل، قالوا انك شخص ولا اهضم، بس باكتر ادوارك التمثيلية بتكوني جدّية. صراحة انا بحبك بالكوميديا اكتر، وانتي شو بتفضلي؟
بيناتنا في أحلى من الضحك؟ إذا في شي بحبّو بالحياة، هو الكوميديا. الدراما طبعاً اساسية، بس المعاناة والاحاسيس فيها تبيّن بالكوميدي. بيكفّي المتل لِ بيقول «شرّ البلية ما يُضحك». إنو ايه، فينا نضحك ونبكي سوا، مش غلط يعني، ca va.
رولا انتي خلقانة بـ18 شباط، وقالوا انو نادين لبكي وجون ترافولتا خلقانين بذات اليوم. أي سيناريو من 2، ممكن تختاري بحال تقدمولك سوا؟ تشاركي بفيلم من اخراج نادين، او من بطولة ترافولتا؟
جوزيفين انتي ما عرفتي بعد؟ انا رح مثّل بفيلم من إخراج نادين لبكي، ومن بطولة JoJo، جون ترافولتا. انو ليش ما استفيد من العرضين؟ اصلاً نادين مخرجة عالمية، فليش ما بتعملنا انا وترافولتا فيلم؟ ممكن، رواق.
شكلك ناويي تضاربي ع ورد الخال اللي قالت عندا فيلم مع براد بيت. طيب شو عنوانو فيلمك انتي وترافولتا؟ «عرابة بيروت نايت فيفر»؟
ايه، ما نحنا بالبلد عايشين دايما بـ fever, يعني كتير راكبة صح… feveeeeer.
لاحقين ع هوليوود، خلينا نروح على تركيا. قالوا معقول تحصلي على الجنسية التركية لأنك مقضيتيها باسطنبول. مبسوطة بتجربة الاعمال المعربة عن التركي؟
بخصوص الجنسية التركية، ما بعرف اذا زتّيتي السؤال هيك، أو عندك معلومة؟ لأنو أنا بالاساس، جدّي تركي. اجا علبنان وتجوّز ستّي اللبنانية وبقي هون. فيني احصل عالجنسية بسهولة، بس ما إلي جلد جمّع اوراق ومستندات. اما تجربة التمثيل باعمال معرّبة عن التركية، فليش لأ؟ فيها تكون «تراند» لانو الناس حابة هلأ هالنوعية، وفيها تكفّي أو ما تكفّي. بالوقت الحاضر انا بلاقيها حلوة وناجحة وexperience جديدة، وما بتلغي غيرا من انواع المسلسلات الأخرى. هالتجربة اصعب وفيها تحدّي، انا مثلاً ما شفت مسلسل الخائن بالنسخة التركية، حتى ما إتأثر بشخصية نادين التركية وحركاتها. ضروري ما تعملي copy paste وتقدري تقنعي الجمهور وتنسّيه الممثل التركي بذات الدور، وأهم شي تضيفي من روحك على الشخصية.
