مرحبا كلوديا. انتي هون أو بباريس؟
هون
عم بسألك لأن قالوا وين ما بتضيعوا كلوديا، بتلاقوها بباريس. هالقد مغرومة بباريس؟
هوهوووو. ولا سفرة سياحية بعملها، إلا ما روح بالأول ع باريس ومنها بكمّل لغير محل. باريس صارت بالنسبة إلي، إلي. بعرفها متل ما بعرف بيروت وبصاليم مطرح ما ساكنة. زايرتها شي 40 مرة وبعدني كل ما زورها بحس بنفس الفرحة. بحبا، عندي ضعف عليها.
قالوا انو عندك ضعف عالكتابة كمان. وقالوا إنك بالاساس ممثلة جيدة جداً قبل ما تتحولي للكتابة. ليش بعدتي عن التمثيل؟
كتير حلو اذا قالوا إني ممثلة جيدة جداً، لأنو التمثيل شغف كبير بالنسبة الي، وعشت فيه سنين قبل ما انتقل للكتابة. وقفت التمثيل لما بلشت اكتب لسببين: اولاً الكتابة عالم بحد ذاته، ما فينا نعمله نص نص، وما فينا نعمل شي تاني حده. الكتابة الحياة كلها خصوصاً لمّا الواحد يكون على طول عم يكتب، مش إنو كل كم سنة بيكتب شغلة. اما السبب التاني، فبالكتابة في قسم كبير من التمثيل، يعني إنتي وعم تكتبي شخصيات، بتبقي حاسة إنك عم بتمثليهن. لهيك مش حاسة بالفراغ، بالعكس الكتابة معبيتلي كل وقتي وكل حياتي، لأنها شغفي.
قالوا انتي من اغزر كتّاب الدراما واتربعتي على عرش الكتابة لسنوات طويلة، بس حالياً مخففة شوي. مزبوط متل ما قالوا لأنك مشغولة بمحترف كتابة بيحمل إسمك؟
أنا اليوم مش مخففة. بالعكس النشاط بعدو متل ما هو، و أنا حالياً عم بكتب 30 حلقة لل LBC و45 حلقة لشركة «الصبّاح». بس اليوم الشغل تغيّر، وبلبنان مش عم بيكون في انتاج. تلفزيونات لبنان مش عم يعملوا انتاج محلّي واللي عم نعملو عم بيروح منصة ولبرّا. كمان الشغل مع برّا صار بياخد وقت اطول، من الكتابة للتصوير. أما بخصوص المحترف، مزبوط، أنا اليوم عندي atelier باسمي تحت ادارة اكاديمية Growth، وعندي تلاميذ كتير، قدّي وأكبر مني واصغر مني، وكتار منهن موهوبين جداً، ومبسوطة فيهن كتير، وعم نعمل شغل حلو. مبسوطة بهالتجربة وعم طورها اكتر.
قلتي عندك تلاميذ كتير، وعندك صداقات فنية كتير متل ما قالوا، من ضمنن كارين رزق الله.
مزبوط، انا صحبة مع كتير ممثلين وكتّاب ومخرجين وحتى في عندي اصدقاء بيغنّوا. وطبعاً كارين رزق الله من بيناتن.
معقول ما في بينك وبين كارين غيرة وعداوة كار؟
لأ، أبداً ما في غيرة بيناتنا. منحب بعضنا كتير، ونحنا ناس ناضجين ليكون عنا غيرة كار. ممكن يكون في صداقة بين تنين بهالمهنة، اذا كان عندن عقل وثقة بنفسن ونفسيتن حلوة.
ع سيرة كارين، مزبوط متل ما قالوا عم تكتبوا مسلسل سوا؟
مزبوط، مسلسل ال LBC عم بكتبو انا وياها، ورح يكون اسمي واسما عليه. وهيدي تجربة كتير حلوة، واليوم انا عم بشتغلها مع طلابي بالمحترف، عم علّمن شو يعني ورشة كتابة.
قلتي انك بتحبي الكتابة واصدقائك وطلابك، وقالوا انك بتحبي السوشي، بس ما بتحبي تاكلي اكل مسخّن. مزبوط مسماية بسينك «سوشي مارشليان»؟
مزبوط. بالنسبة الي، الاكل اول ما يكون خالص وسخن، بيكون اطيب، يا أمّا باكل جبنة، لبنة، شو ما كان. السوشي بحبو كتير، بس بحب بسيني سوشي اكتر، لأنو عمرو تقريبا 20 سنة. قليل بسين يعيش هالقد، وعم عيش معو «ختيرتو» وعم داريه، لأنو لو كان شخص، كان بيكون عمرو فوق ال 90. حبيبي «سوشي»، انا بكتب وهو قاعد صافن فيي.
