قالوا عنو «انسيكلوبيديا متنقلة»، عاشق أبدي للفن، شغوف بالمسرح والدراما والادب وباحث دائم عن الكمال… قالوا عنو كتير، وكل هالأقوال كانت مقرونة بصفات الشغف الكبير لكل شي كان يقدّمو. لهيك مش غريب يسدُل الستارة على مسرحية حياتو على الارض يوم عيد الحب، بـ 14 شباط 2023، لينتقل لعالم افضل اكيد. بالذكرى الاولى لغياب الكاتب والمنتج مروان نجار، زاوية «allo وقالوا» حبّت توصّلو شو حابين ابنه زياد والممثلة السي فرنيني (اخت زوجته فريال) والاستاذ اميل شاهين والمخرج ميشال جبر والممثلة رندة كعدي يقولوله... استاذ مروان انت عالسمع؟
زياد نجار:
بيّي اشتقتلك. طمّني كيف المطبخ بهالجنة؟ عم تقسا عالوايتريّة أو ماشي الحال؟ وبعدين، طلع يسوع قاري القرآن، والّا إنت قرّيتو ياه؟ كمان انتبه، ما تقعد كتير تتشاور عاللغة العربية مع محمد، نحنا مسيحيي خيّي، ما بدنا يسوع يغار… شو ممكن قول عن مروان نجار؟ اذا بدّنا نقارنو بأبرز شخصيات العصور السابقة، ما في الا اسم واحد بيجي على بالي، ويليام شكسبير، اللي قد ما كان متقِن بعملو، غزير بافكارو وكتاباتو، طلعت عليه اشاعة بتقول، شكسبير مش رجل واحد بل مجموعة ناس بتكتب تحت اسم شكسبير. لو بيّي كان موجود بعصر سابق متل شكسبير، واتعرفت عليه الاجيال بعدين، بظن من تنوّع وغزارة وكمال كتاباتو، كانت طلّعت عليه نفس الاشاعة: مروان نجار ليس رجلاً واحداً، هو مجموعة ادباء بيكتبوا تحت نفس الاسم.
إلسي فرنيني:
مروان، ما كنا متوقعين تتركنا بهالسرعة، بظرف شهرين، هيك تنخطف عنا وعن عيلتك ومسرحك ومسلسلاتك واحلامك، انت اللي كل حياتك ركض وشغل وانتاج ومشاريع واحلام. ما بيوقف عندك الحلم كأنك بعدك شي مبلش وكأنو عمرك عشرين. من كم يوم كنت عم بحضر تكريم رجال الاعلانات على LBC، وتذكرتك بقوة وغصّيت، لأنك كنت رائد بهالمجال، بنصوصك وافكارك الاوريجينال، وتذكرت قديش كنت تسهر ليالي لتطلع بفكرة اعلان كامل متكامل. ضيعانك مروان لأنك انسان كانت بتلبقلك الحياة.
إميل شاهين:
انا ومروان ارتبطنا بصداقة متينة من بعد مشاركتي ببرنامج «المتفوقون» من إعداده، وهو اللي فتحلي مجال اقدر علّم سينما بالجامعة. لهيك دور مروان نجار ما اقتصر بس على التلفزيون والمسلسلات، واطلاق نجوم كلن من طلاب معاهد التمثيل، وخلق حركة مسرحية شدّت كل الناس ليحضروا مسرح. دور مروان كان بارز بالسينما كمان، لأنو لو ما الفيزا اللي عطاني ياها من خلال «المتفوقون»، ما كنت قدرت اقنعت مجموعة من المعاهد إنهم يبلشوا يدرّسوا audio visual. لهيك، اذا مروان عم تسمعني، بدّي اشكرك لأنو فضلك كبير على انطلاقتي بهالمجال. مروان انت بالنسبة إلي بعدك موجود، بحسك مسافر وكتير اوقات بجي بدي تلفنلك. حضرت من كم يوم مسرحية ابنك زياد، وكتير فاجأني ككاتب وكممثل، وحسيت لازم هنّيك بابنك ونتناقش حول المسرحية. شو بدي قلك؟ انا كتير مشتقلك. الناس متلك ما بيموتوا، بيصيروا خالدين.
المخرج ميشال جبر:
مروان عم نستفقدلك. خسرنا مُحاوِر. كنّا نقضيها نتناقش بالمسرح والادب والنقد. هلأ ما بقى في حدا نتناقش معو. اشتقنالك مروان.
الممثلة رندة كعدي:
14 شباط ذكرى عيد الحب، وانت علمتنا نحب ونعشق ونعطي شغلنا بدون ما نسأل. مروان نجار عم تسمعني؟ متأكدة إنك عم تسمعني، لأنك حاضر دايماً باختياراتي لأعمالي. كنت دايماً انطر تعليقك وتشجيعك وثناءك على اللي عم قدّمو، هلأ مين بدّي انطر؟ حبيبي انت، تبقى اعطيني إشارة. الله يكون معك وين ما تكون. رح تبقى ذكرى الحب.
