راغدة، مش رح قلّك اشتقتلك لأنو عم شوفك كل اسبوع ببرنامجك الناجح «زمن» على LBC.
الحمدالله على نجاحو والاصداء كتير حلوة. وما تنسي هيدي اول اطلالة رسمية الي على LBC. وكان الرهان صعب خصوصاً إنو البرنامج عم ينعرض بذات الوقت على تلفزيون «دبي» كمان.
قالوا «زمن» رح يتوقّف خلال رمضان. في رجعة بعد رمضان؟ او انتقال لمصر مع برنامج جديد؟
كل البرامج بتتوقف برمضان. بعد عندي حلقة ما انعرضت، وما بعرف اذا منلحق نعرضها قبل رمضان. صراحة ما حكينا بعد بخصوص حلقات جديدة. وبخصوص مصر، هلأ فتنا بفترة رمضان وكل شي واقف. منشوف بعد رمضان.
انا متفاءلة بموسم جديد من «زمن». وانتي بتتفاءلي بالنجم المصري محمد حماقي. هيك قالوا.
أكيد بتفاءل بالنجم محمد حماقي، لأنو أول لقاء عملتو بمصر كان معو، ودايماً بقول إنو وجّو كان خير عليّي لأنو من بعد هاللقاء، تعاقدت مع قناة «الحياة» وابتدا المشوار بمصر.
مشوار بتنرفعلك عليه القبعة، والكل قالوا انك من اهم الاعلاميات اللي قدرتي ثبّتي حالك بمصر واحتليتي الصدارة، وهالشي صعب.
صح، كتير صعب الواحد يقدر يثبت حالو بمصر، ويمكن صار من سابع المستحيلات نظراً للكمّ الكبير من الاعلاميين الموجودين على الساحة، ومش بالهيّن تتواجدي وتتركي بصمة ويصير اسمك بين الكبار. الحمدالله اني قدرت اعمل شي.
بمصر قدمتي برامج متل «قطعوا الرجالة». مين من الاعلاميين قال «قطعت راغدة»، وحاول يفرمل مسيرتك؟
ماحدا. تَ قلّك حرب مباشرة وعلنية، ما صار. هلأ رح تستغربي لمّا قلّك إنو يمكن كان في اكتر تحرتُق من برات مجال عملي. على عكس الزملا المنافسين، واللي عندي مع معظمن علاقات طيبة كتير متل بسمة وهبي الصديقة المقرّبة، ومفيدة شيحة ودعاء فاروق وتامر أمين وغيرن.
طيب ما حدا قال «قطعت راغدة»، بس قالوا انك شخص خطير وممكن تهددي المجتمع. بدليل ايقاف برنامج «قطعوا الرجالة». شو القصة؟
القصة وما فيها إنو اسم البرنامج كان مثير للجدل شوي، فكان قرار المجلس الأعلى للإعلام إيقافه لحين تغيير الاسم. اعتبروا العنوان فيه تقليل لقيمة الرجل، ونحنا اخترناه من باب المزح، وهو محط كلام شعبي متداول بمصر. طبعاً التزمنا وصار اسمو «تحيا الستات».
طيب ياسمين عز من الاعلاميين المقربين؟ هي مش كتير مع «تحيا الستات».
لأ مش من المقربين، وبس» كِدا». ما تحركشي.
طيب، المقربين منك بيقولوا انك من اكثر النساء «هضامة». ليش ما توجّهتي للتمثيل الكوميدي، خصوصاً انو اعلاميات عديدات خاضوا مجال التمثيل؟
هضامة مزبوط، بس ما بعرف اذا بتبيّن على الشاشة. بالحياة انا اهضم. على التلفزيون بعطي جدّية اكتر بالطرح. التمثيل ما استهواني ابداً. كان الي تجربة مع المنتج مروان حداد بمسلسل «حلو الغرام» ولعبت دور مذيعة. ما حبّيت، وما بعرف احفظ نص وشي كتير صعب تحافظي على ذات الموود وتعيدي «راكّور» 100 مرّة، وسهر وتعب. لأ، التمثيل مش ملعبي. قوليلي مقابلة وطاولة وضيف، بيطلع قوام الادرينالين عندي.
هالقد بتحبي المقابلات، بس قالوا ما بتتحملي تشوفي حالك عالشاشة. مزبوط؟
- لقطّيني. شو عرّفك يا محتالة؟ بالزمانات الست مريم شقير ابو جودة قالتلي «اوعا ما تحضري حلقاتك، حتى تقدري تحسّني اداءك». بس مش بايدي، لأنو انا حدا سئيل كتير بحق حالو، بصير بدّي انتقد شكلي وطريقة طرحي للسؤال، وبطلِّع كل شي في «ديفويات» فيّي. لهيك باخدها من قصيرا وما بحضر حالي ابداً. ممكن احضر مقطع، بس حلقة كاملة من الجلدة للجلدة، ولا مرة.
