- صباحو عماد، فيك تحكي؟ لأنو قالوا بعدك عم بتصوّر "ع أمل"، وشفناك واقف ضد يسار. في أمل تخبرنا شوي اكتر عن دورك؟
- ألو، ألو، اكيد فينا نحكي، ومزبوط واقف بجبهة ضد يسار. عم بلعب دور ايدا اليمين للمذيعة تينا. ما فيني قول كتير حتى تستمتعوا بالمشاهدة، وانا بدّي انتي تقوليلي اذا حابة وشو رأيك؟
- أنا حابة كتير المسلسل. وبخصوص دورك، بيقولوا انو بعض الادوار بتسجن الممثل بشخصيات معيّنة. انت نجحت بشخصية المُساعد "النعنوع" والطريف ب "50 الف" و"كريستال". ما خفت انو يتم تعليبك ضمن هالايطار؟
- انا ما بخاف ابداً إني "إتعَّلب" ضمن إطار معيّن، لأنو قبل "50 الف" كنت عم مثّل من ايام "طالبين القرب" و "من احلى بيوت راس بيروت"، ومشارك ب "لونا"، "سارة"، "باب ادريس"، "مراهقون"، "لأنو الحب"، "امرأة من ضياع"، وكتييير غيرن وكلن مش ادوار كوميدية، و"اخترب الحي" و"وجع الروح" ما خصن ابداً بالكوميديا. وحتى بعد "50 الف" لعبت ادوار ما خصا بهالشخصية ولا بالكوميديا. أنا ما بخاف لأنو أنا ممثّل وبفصل بين شخصية تمثيلية والواقع، وكممثل مفروض العب كل الادوار. لمّا يتقدّملي دور حلو، اكيد رح العبو.
- قلت انك شاركت بعدد كبير من الاعمال الفنية، بس كتار قالوا انك تميّزت بالادوار الكوميدية متل "50 الف". الكوميديا اصعب من الدراما، فايمتى ممكن نشوفك الرقم الصعب بمسلسل كوميدي من بطولتك؟
- مزبوط انا نجحت بدور ايزاك ب "50 الف" وصراحة هالسؤال كتير صعب، ومش لازم يتوجّه الي، لأنو انتي بتعرفي انو اللعبة مش عنا، عند المنتج والمخرج وحتى الكاتب. مش انا بختار نفسي للدور، هني لازم يختاروني. هلأ ايمتى رح يوقع الرهان عليي بدور بطولة، كوميدي أو غير كوميدي، أنا جاهز وعَ بالي وحابب. مش عم بحكي عن دور ال Jeune Premier، انا مش Jeune Premier، انا عم بحكي عن ادوار صعبة ومركّبة وحلوة.
- حلوة متل الصداقة اللي بتجمعك بالممثلة ميرنا مكرزل. هيك قالوا. وانت شو بتقول عن سر هالصداقة؟
- مزبوط، انا وميرنا بتجمعنا صداقة، وسرّها انها حقيقية مش مبنيّة على غايات. ابتدت خلال تصوير مسلسل "50 الف" واستمرت ورح تبقى مستمرة لأنو تنيناتنا حقيقيين وما عنا مصالح. من بعد اول مسلسل سوا، ارجعنا التقينا ب "لو ما التقينا" وما التقينا على بلاتو التصوير، وكمان شاركنا بفيلم "ع مفرق طريق" اللي انتي كاتبتيه، وكمان ما في مشاهد جمعتنا. من هون بتحسّي قديش صداقتنا حقيقية، مش الصداقة اللي بتخلص بعد انتهاء التصوير. ميرنا كتير بتشبهني، ما بتسكت عالغلط، بتطالب بحقها، حقيقية ومحبّة، وأنا هيك. هيدا السر الوحيد لصداقتنا.
- اخيراً، قالوا انك بتحب كتير السيارات، وانت من عيلة معظم افرادها من ابطال الراليات. طيب ليش مسيرتك الفنية ماشية عَ مهلا؟
- مزبوط، كتير بحب السواقة والسرعة، وبسوق منيح، "شوفير" متل ما بيقولوا. وصحيح في كتير من افراد عيلتي ابطال، وانا بفتخر فيهن قد الدني. وكمان مزبوط، مسيرتي المهنية ماشية شوي على مهلا، وبرجح السبب لكوني خجول بالحياة رغم اني جريء بادواري، وهيدي المهنة بدا حدا يطاحِش. في ناس بيفكروني عم بتكبّر، وشايف حالي. مش صحيح ابداً، أنا بستحي واكتر الاوقات ما بيكون إلي عين اعمل خطوة تجاه المنتجين والمخرجين، لهيك بحس مسيرتي ماشية عَ مهلا.
