مرحبا حسن وفطر سعيد بالحبس. شو بتقول لكل اللبنانيي اللي تابعوا « ع امل» وانبسطو بنهايتك بالحبس؟
اول شي، ينعاد على الجميع بعيد الفطر السعيد وعيد الفصح المجيد. تاني شي، بحب قول لكل اللي انبسطوا انو عقيل صار بالحبس، معكن حق ولازم تنبسطوا. شخصية عقيل من المنطقي تنتهي بالحبس، لأنو عقيل مش قاتل، نحنا ما شفناه بالمسلسل عم يقتل. هو كان متمسك بالعادات والاصول والتقاليد والتربية، وكان نوعاً ما تابع لسيف الأجرأ منو بتنفيذ الاعدامات. هلأ عقيل وسيف بمفهومن هني مش مجرمين، لأنو هيك تربّوا وتشربوا العادات، وبضيعتن يُعتبروا زعما والكل بيهابن وبيحترمن. عقيل انتهى بالحبس، بس هو مش مجرم، وممكن يطلع، فانطروه.
ما رح ننطرو لأنو ندين جابر قالت ما في جزء تاني. على كل حال كلنا منقول انك اكتر شخصية مكروهة اليوم بلبنان انت والممثل عمار شلق. انت عندك بنات، فقديش في نسبة جواتك من هيدا الرجل الشرقي؟
لما تقولي انا وعمار اكتر شخصيتين بيكرهونا الناس، يعني نجحنا بتجسيد شخصية عقيل وسيف بصدق وبشكل صحيح متل ما رسمتن المبدعة ندين جابر. طبعاً في كتير اشيا بعقلية عقيل أنا مش معها بتاتاً، بس في قصص بأيدها متل احترام الام وحفظ المقامات. انا عندي بنات وكلنا بالنهاية رجال شرقيين، بس بتعامل مع بناتي بشكل update، براعيهن، بمشي معن، بنتبهلن، وما بحياتي بمد ايدي عليهن. ما بتحمّل اسمع عن رجل بيمارس العنف على المرأة والاولاد. هيك رجل انا بسبّو. ليش بدك تضرب وتقتل؟ مش متفق مع مرتك طلقها ونقطة انتهى. الضرب سلوك سيئ ومش حسن. طبعاً مش حسن حمدان.
قالوا شاركت خلال مسيرتك بالدراما المشتركة واللبنانية، بادوار عديدة بين الشر والطيبة. أي دور هو الاحب على قلبك، ويا ريت ما تقول متل كل الممثلين «ادواري متل اولادي، ما بفرق بينن».
معظم الاعمال اللي شاركت فيها نجحت الحمدالله، من «ما فيي»، و›الباشا»، و»حكايتي»، و»اسماء من الماضي»، و»عشرة عمر»، و»التقينا»، و»الزمن الضائع» وصولاً ل «ع أمل» اللي هو الاكثر سطوعاً، لأن موضوعه لامس كل العالم واثبتنا عن جدارة الممثل اللبناني. هلأ لأ، كل الادوار مش متل اولادي، لا بل اعزّ. وما بفرّق بيناتن، بس عطول بيبقى في ولد اقرب للقلب. شخصية عقيل هي الاكثر بروزاً وانا قدّمتا من كل قلبي، لأنو أنا كممثل في غرام بيني وبين ادوار الشر. يمكن لأن بحياتي الطبيعية انا شخص كتير طيب، لهيك بتفنن بتقديم دور الشرير.
قالوا انك شاركت بدوبلاج سلسلات كرتونية كثيرة. اي شخصية كرتونية بتتمنى تجسدها بفيلم او مسلسل؟
عندي آلاف حلقات الدوبلاج، من دراما ووثائقيات وكرتون. أما اكتر شخصية كرتونية استمتعت بادائها فهي «طبّوش» بسلسلة «لولو الصغيرة»، ويا ريت بقدر جسدها بالواقع لأنها بتناسبني كوني انا شوي «نصّوح».
قالوا كمان إنك ميسي بالملعب. كيفك انت وكرة القدم؟
مزبوط أنا بعشق كرة القدم، وانا بلبنان نجماوي، وعالمياً برشالوني اولاً وأخيراً، على شوي ليفربول ويونايتد وباير ميونخ. ومزبوط انا بلعب فوتبول وفيكي تقولي إني مزيج من ميسي ورونالدو وسقراط وزيكو ورونالدينيو بالملعب. وانا أقوى شي بالتهديف، ما بلقط الطابة إلا وبحط غول. عنا فريق فوتبول من الفنانين مألف من مجيد الرمح، نادر الاتات، علي منيمنة، مهدي فخر الدين، جيسكار لحود، معين شريف، صبحي توفيق ومروان الشامي. منشارك بكتير دورات ومباريات ودّية، وأنا بكل فخر هدّاف فريق الفنانين.
