كتابات تستحق النشر

النهر ما بْيترك حدا

الساعة حْدَعش

يوم الأحد

قبل الضهر :

الِوْلاد راحو يلعبو

حدّ النهر

بنت وْصبي حلوين

و تْيابن زهر ...

والأمّ خيّاطه

وْشاغل بالها

يطلع معاش الشهر

عَ قياس الشهر

والبٓيّ عم ينعس

عَ كرسي قبالها

والزهر عم يغفى

عَ طاولْةِ الزهر ...

خمسه وربع

يوم الأحد

بعد الضهر :

رجْع الصبي

والبنت غرْقت بالنهر

والبٓيّ عم بيضبّ

طاولْةِ الزهر

والأمّ عم بتخيّط

تياب القهر ...

هلّق ظبط عالقدّ

مصروف الشهر ...

• ابراهيم شحرور
• النهر