أيقونة الغناء الفرنسي إديت بياف غنّت «La vie en rose»، ومع منال ملّاط، المغنّية والممثلة اللي رح تقدّم نشيدا الخاص لتكريم إديت بياف ، شهر عيد الحب رح يكون «La vie en rose».
- بـ 7 و8 شباط، رح تقدّمي ع مسرح «كازينو لبنان»، حفلين لإديت بياف بعنوان «نشيدي إلى بياف». ليش بياف، وهل هالحفل بالنسبة إلك «Un rêve en rose»؟
عن جد هالحفل الموسيقي هوّي «Un rêve en rose» بالنسبة إلي، لأنّو حلم عندي ياه من أنا وصغيرة. كبرت أنا وعم إسمع وغنّي لإديت بياف. هيّي من أكتر الفنانين اللي أثروا فيّي وعلى هويتي الفنية، وهلأ إجا الوقت حقِّق هالحلم من خلال «نشيدي إلى بياف». هالحفل هوّي تكريم للمدرسة بياف، ومعي عالمسرح رح يكون في فرقة أوركسترالية من 20 عازف، بقيادة المايسترو داني بو مارون، ومن إخراج كريستيان أبو عنّي.
- يعني بعد داليدا، إديت بياف رح تتقمّص على مسرح «كازينو لبنان»؟
لأ، أنا مش عم بتقمّص شخصية بياف، والحفل مش مسرحية. أنا عم غنّيلا وكرّمها ونقّيت أحلى أغنياتها، وهالشي كان كتير صعب، لأن معظم أغانيها «Hits»، فكيف فيكي تنقّي؟ بس اخترت الأغنيات اللي أنا والجمهور منحبّا كتير. وبوعدكن بكتير مفاجآت.
- المفاجآت ما بينعلن عنها قبل بوقت، بس ما فيكي تخصّصينا بوحدة؟
مبلا، رح يشاركني بلوحة غنائية الفنان مايك ماسي. كتير مبسوطة بهالمشاركة الخاصة، لأني كتير بحبّو وأنا من معجبينو.
- لقبّتي بياف بالمدرسة، والحلو إنو هالحفل الموسيقي في وراه هدف انساني «فنتاستيك»، إلو علاقة بتلاميذ المدارس. خبّرينا عنّو.
صحيح، في هدف انساني بيعنيلي كتير. قسم من الأرباح رح يروح ريعو لـ «جمعية القديس بورفيريوس»، وهيّي جمعيّة خيريّة صرلا عم تشتغل من سنة 2002 لتأمّن مساعدات طبّية ومدرسيّة وغذائيّة للعائلات المحتاجة لدعمن بهالوضع الصعب. الجمهور اللي حيحضر الحفل رح يستمتع بأجمل أغنيات بياف، ورح يساعد بالوقت ذاتو هالجمعية لتكمّل مهمّتها بمساعدة تلاميذ بحاجة للدعم ليكمّلوا دراستن.
- ع سيرة الدراسة، إنتي درستي التمثيل والإخراج، وكنتي بطلة الفيلم المهضوم «تلّتت». التجربة كانت «فنتاستيك»، ليش ما كرّرتيها؟
التجربة وإقبال الجمهور كانو سوبر «فنتاستيك»، وبعدن لهلأ الناس بيحضروه وبيسألوني عنّو. ساقبت ما رجعت مثّلت من بعدو لأنو ما صار في فرص، وإذا انعرض عليّي أكيد بكرّرها مرّة ومرتين وعشر مرات، لأنو التمثيل عالم بعشقو من أنا وصغيرة. مثّلت بكتير مسرحيات غنائية، بس بحبّ فوت أكتر بعالم السينما والمسلسلات.
- بفيلم «تلّتت» لعبتي قدام طوني عيسى وسينتيا كرم وكارمن بصيبص. لو قادرة تختاري ممثّل عربي أو عالمي لتشكّلي معو ديو «فنتاستيك»، مين بتختاري؟
إذا ممثل عالمي، بختار هيو جاكمان، وإذا عربي، بنقّي بديع أبو شقرا… كتير بحبّو.
- وبما إنك مغنّية، مع أي مطرب عربي أو عالمي بتتمنّي تسجّلي أغنية ديو؟
إذا عالمي بختار فرقة «Imagine Dragons» وبعتقد الديو مع مغنّيها الاساسي دان رينولدز بيتطلع «فنتاستيك». وإذا فنان عربي، بنقّي المغني التونسي Balti لأني كمان كتير بحبو وبحسّ سوا ممكن نعمل ثنائي رائع.
- بالختام، ما فينا ما نذكر إنو في تقاطع بين حياتك وحياة بياف. إديت كانت مصابة بالسرطان، وفقدت بصرها بطفولتها وشفيت بمعجزة، وإنتي فقدتي جزئياً بصرك بعينك اليمين وشفيتي من مرض السرطان. شو الدرس الـ «فنتاستيك» اللّي علّمك ياه الانتصار على مرض مميت؟
أكبر درس تعلّمتو وبعدني عم إتعلّمو ، إني عيش كل لحظة بلحظتها، وعيش بتفاؤل لأنو الواحد ما بيعرف شو بيصير بهالحياة. العمر بإيد الله، وكتّر خيرو عطاني فرصة تانية، هيدا أهم شي، والباقي كلّو، ما في شي محرز.
- يعني إنتي متل بياف «Tu ne regrettes rien»!
كيف ساقبت هالأغنية من أكتر الأغاني المفضّلة عندي لبياف. كلّ التجارب الحلوة والصعبة والمرّة اللي قطعت فيهن، هنّي شاركو بتكوين شخصيتي وعملوني، لهيك أنا كمان ما بندم على ولا شي و «Non, je ne regrette rien».
