إجت كلمة موسيقى من إلَهة الفن عند اليونان "موزا" وبتعني علم الألحان.
وإجت فكرة الموسيقى من المعابد الدينية بالحضارات القديمة لأن كانوا يعتبروا الموسيقى مقدسة وكانت تنعزف بكل المناسبات الدينية.
أما الألحان الشرقية فإجت من الألحان الكنسية السريانية ووصلتلنا بالتحديد عن طريق مار أفرام السرياني يللي اقتبسا من بَردَيصان يللي حَط 150 لحن بالقرن التاني الميلادي.
مين يعني بَردَيصان؟
فيلسوف وشاعر آرامي غنوصي قدر يشكّل فرقة من الشباب المثقفين الأغنيا لتأدّي ألحانو ومؤلّفاتو وانتشرت ببلادنا انتشار واسع ما إلو متيل...
بالقرن الرابع، يعني بعصر القديس مار أفرام السرياني، يللي كان هدفو يحارب أفكار برديصان الغنوصية يللي ما بتتوافق مع معتقداتو الكنسية، قام مشي عَ خطى برديصان وأخد واقْتبَس من هالألحان العبقرية العظيمة وألّف أشعار عليا وفق إيمانو الكنسي، وكمان رجع أسّس جوقات من بنات وشباب ليأدّوا هالتراتيل يللي صارت مع الوقت أغاني تراثيّة شعبيّة.
مع الوقت، صار في كتير شعرا وموسيقيين سريان متل مار يعقوب السروجي، مار إسحاق، مار بالاي، ورابولا.... يعني باختصار وصلنا ألحان من 37 ملحّن سرياني من القرون الأولى وكلّا كانت ألحان كنسية.
قدرت الكنيسة تحفظا باعتبارا مقدّسة ضمن حيطانا تقريبًا ألف سنة ابتداءً من القرن الرابع .
ليه الموسيقى الكنسية السريانية ومش البيزنطية؟
لأنو الموسيقى البيزنطية كانت موسيقى وقورة بتناسب الإمبراطورية والعظَمة يعني موسيقى للملوك وللنخبة عكس الموسيقى السريانية يللي تميّزت ببساطتا وسلاستا لأنا موسيقى الفلاحين والناس الشعبيين، الهدف منّا التعبير عن مشاعر الناس العاديين منشان هيك تفاعل معا الشعب وتبنّاها.
الألحان التمانية Octoechos
الكنيسة الرهاويّة هي منبع كنوز الألحان السريانية وابْتكرت ما يُسمّى الألحان التمانية يللي هي أساس الموسيقى الشرقية لليوم ومتل ما قال الفارابي * إنّو الألحان التمانية السّريانيّة هي عمود الموسيقى الشرقيّة والألحان الشعبيّة الخاصّة بسوريا ولبنان هي ميّة بالميّة موسيقى سريانيّة شعبيّة.
شو يعني الألحان التمانية؟ ليه تمانية؟
إجت من فكرة التراتيل يللي كانوا ينشدوها إيام الآحاد التمانية بعد عيد الحصاد وانْعرفت بإسم أوكتو إيكوس Octoechos
وشو هني هالألحان التمانية:
1- بيات: اللحن الأول من الألحان السريانية التمانية...
بياتي كلمة سريانية بتعني عزّا أو أفرج الهمّ...
هيدا لحن الفرح، بيقولوا إنو الرهبان كانوا يرتلوا وبيدبكوا دبكات عَ هالألحان.
2- حسونو: اللحن التاني من الألحان السريانية التمانية
بالعربي حُسيني.
3- سيكا: اللحن التالت من الألحان السريانية التمانية
أور آك بالعربي عِراق أو عُراق ... منسميه سيكا Sega
وبيجي مغيّر بإسمين: كار كود أو نهَوَند.
4- رصد: اللحن الرابع من الألحان السريانية التمانية
أو رست rast - المستقيم.
5- أوجو: اللحن الخامس من الألحان السريانية التمانية
بالعربي: هُزام أو الأوج...
6- الأوجوم: اللحن السادس من الألحان السريانية التمانية
بالعربي: العَجَم...
7- صْبا / الصَبا: اللحن السابع من الألحان السريانية التمانية
ܨܒܐ(صْبا): أراد / شاء(بالسرياني) وبالعربي بيعني ريح الشمال
هو لحن حزين كثير ... بيستخدمو بمراسم الشهداء وبالجمعة العظيمة.
8- حاجو ܚܰܓܐ: اللحن التامن والأخير من الألحان السريانية التمانية
بالعربي إسمو الحجاز، (نفس لحن الآذان عند المسلمين.... الله أكبر).
أغاني تراثية شعبية من الألحان السريانية
- لحن أفرامي سداسي: هدّوني هدّوني عينيها سحروني
- لحن أفرامي سباعي (القرّادي): - جيب المجوز يا عبود
- طلّوا طلّوا الصيادي وسلاحن يلمع يابا
- لحن أفرامي الأحد عشري /11: - خضرا يا بلادي خضرا
- عَلى دلَعونا
- من الألحان الأفرامية : بردا برداني بردا....
وغيرن من الأغاني الشعبية متل: هلا يا هلا (زكي ناصيف) وعالدبيكة الدبيكة...
وللعلم كتير من القدود الحلبية مأخودة من الألحان السريانية مثل نغمات "البلبل ناغى عا غصن الفل"، و "يا إمام الرسل يا سندي".
والإرث الموسيقي السرياني بضمّ تسعة آلاف (9000) لحن سرياني بس للأسف أغلبا ضاع وبقي منا بَس ألفين وميتين (2200) لحن.
