بعد أيام من تكريمه في "مهرجان بيروت الدولي للأفلام القصيرة"، كتب أمس الفنان جورج خبّاز في منشور على "فايسبوك": "اليوم عيد ميلادي، ما بحياتي كنت بتخايل إنو تكون الهدية هالقد حاملة حب وتقدير ووفا وفخر. اليوم انحفر اسمي ع أحد شوارع البترون اللي كل شوارعها محفورة بقلبي، مطرح ما ربيت وتعلمت ولعبت وحبّيت وبكيت، مطرح ما الحجر إلو قيمة بالبشر، بالناس الوفية والمحبّي. شكرًا لولاد بلدتي، رفقاتي وأهلي وناسي. شكرًا للمجلس البلدي على هالقرار بالإجماع، من رئيس البلدية الأستاذ مارسيلينو الحرك لكل الأعضاء اللي بيمثّلو البترون بحلاوة ناسها. ما قدرت حبست دموعي لما أعلنو عن تسمية الشارع اللي ربيت فيه صغير باسمي، خلال افتتاح فعاليات "مهرجان الأفلام اللبنانية القصيرة" اللي بيعنيلي كتير وبيعنولي القيّمين عليه. بشكركن فردًا فردًا وبقلكن إنو الفخر متبادل. وإمي وبيّي بقلّن إنشاالله كون وفيتكن جزء بسيط من محبّتكن وتضحياتكن. البترون، مرة جديدة، بتكوني سبّاقة ومثال للكتار، رجعتوني ولد بالشارع اللي صوّرت فيه "غدي" واللي كان يودّيني ع مدرستي وع أول مسرح بحياتي بساحة مار اسطفان".
وفي إطار تكريم القامات الفنية اللبنانية بإطلاق أسمائهم على شوارع في المناطق التي عاشوا فيها، يُذكر أنه جرى أخيرًا إطلاق اسم المطربة الراحلة نجاح سلام (1931-2023) على شارع في منطقة المزرعة في بيروت، جرى افتتاحه في 23 تشرين الأول الماضي، خلال احتفال رعاه رئيس الحكومة نواف سلام، ومثّلته فيه عقيلته السفيرة سحر بعاصيري، التي رفعت الستارة عن اللوحة التي تحمل اسم الشارع، بحضور عدد من أفراد أسرة الفنانة الراحلة وشخصيات.
