المخرج ايلي فغالي

مطرح ما عم يسري عم يهري

3 دقائق للقراءة

​إذا فكرت شي مرة تسأل حالك وأنت عم تتغدا: "يا ترى هاللّقمة عم تقوينا ولا عم تختبر مناعتنا؟"، بيكون جوابك أسرع من سرعة الإنترنت بلبنان!

​بلّش فتش بالصحن:

لحوم فاسدة "بتشبه المسؤولين" ودجاج مسلمن (يعني مليان سالمونيلا وحقن لراحتك)؛ وألبان وأجبان مضروبة

أما الخبز المكرر؟ فحدّث ولا حرج: رغيف مبارح بينخلط مع الجديد، يعني المرتجع بينباع طازة.

والمعلبات؟

هاي قصة تانية، بينعملّها "Update" أحسن من تيليفون الآيفون، بيغيروا تاريخ الإنتهاء وبتنتهي الحكاية.

​هيدا عدا عن البضاعة المستوردة عبر البحار: مثل اللحم الهندي، والمواشي المريضة، و"زبالة العالم" يلي بيعيدوا تدويرها وبيصدرولنا ياها، وطبعاً النودلز الهوتدوغ البرغر لمفرّز ومعلبات المرتديلا واخواتها وصولا للجمبون والحبش وأشباههما . وفوق الكل، الحليب المستورد عبر نباريش معقمة بأفضل الطرق الحديثة، يلي بينتقل طازة عبر الجبال والسهول... من البقرة السورية، للتاجر للمستهلك ٠

​ من البيضة لمزارع الإنعاش!

​الدجاج لبناني منذ أكثر من عشر سنوات.

إذا عملنا عملية حسابية زغيرة عا الدجاج بس، وشفنا كم محل دجاج موجود بكل حارة وضيعة، منعرف دغري شو عم ناكل!

​عندك الدجاج البروستد، الناغتس، والكريسبي وعائلاتهم في لبنان والمهجر ؛ كُلّها بتنزل بنقعتها وبتسبح بزيت بيبقى عم ينقلي فيه نهار كامل إذا مش أكتر! لا ومين؟ زيت النخيل يلي كلو سم، وبيتحمل حرارة عالية وبينقلي فيه مية مرة، وطبعاً مع "خلطة النقعات" السرية يلي بتنكّه الزيت وبتعطيك طعمة فريدة... الله يرحم فريدة!

​أما فروج الغاز فحدث ولا حرّوج، وفروج الفحم قصة أجيال ربيت عا ريحته (يمكن بعده الافضل والاقل ضرر) . ونيالك عا سيخ الشاورما! السيخ يلي حامل أعلى نسبة سالمونيلا بالتاريخ، لإنو السيخ بيوزن بمعدل ٣٠ كيلو، وعم يستوي من برا ومن جوا عم يعبي أمراض لإنو القلب بيضلّ ني وعم يعبي حرارة. ولما يوصل السيخ لآخر السيخ بيكون العوض بسلامتك والتعازي من ل ١١ للساعة ٦ المسا . ..

وفوق هيدا كله، بيغمسلك السندويش بـ "الزومات" وبقلّك بكل براءة: "هيدا مسقسق يا معلم!"، غير طبعاً حركة تخفيف النار لما يخفّوا الزبونات، ويرجع يقويها عالطلب !

والسؤال الأهم: كمية هالدجاج الموجودة بالسوق من وين؟ وشو عم ينعطى هالفروج ليصير بـ ١٥ يوم وزنه كيلو وجاهز للبيع؟

جّدي كان يربّي دجاج وليوصل الفروج للكيلو كان بدو ٦ أشهر ولما كانت ستي تسلقو كان يبقى لونه اسمر اما فروج اليوم لونه ابيض وريحته كوكتيل من الزنخة

​اللحمة واللبنة:

قديش فيه بقر مستورد وبلدي ليغطي الاستهلاك المنزلي ومحلات شاورما اللحمة والاوفرات؟ (٢ شاورما علبة بطاطا وتنكة مشروب بس ب ٥٠٠ ألف) والمشاوي؟ ( كل كيلو بيطلعلك شيشين ببلاش)

اما معامل الاجبان واللالبان ويلي بينطبق عالدجاج بينطبق عاللحمة وعالالبان والاجبان،

و كلو بيقلّك "بلدي"!

​طيب، كم مزرعة بتوزع حليب يكفي لكل هالمعامل يلي بتنتج الآلاف من علب اللبنة والجبنة؟ واذا جينا للبنة واللبن يلي مش مكتوب عليه "بلدي"، من شو مصنوع يا ترى؟

نشا وزيوت مهدرجة ليصير طعمها بيشبه طعم اللبنة وشكلا بيلمّع متل بلاط الصالون

​منسال حالنا: ليش كتران السرطان؟ وليش العالم عم بتموت بكير؟ وليش في حالات تسمم؟... لانو بالحقيقة نحنا

عم ناكل ...!