كتابات تستحق النشر

ضحكة الله

لا... مش إمّي الدِّنيِه كِلَّا

هِيٍّه دِنيِه لْ وَحدا إمّي

وِالدِّنيِه حَتّا تِتحَلَّا

عم تِمشي عا دَعسِة إمّي

وأحلا إسم لْ إمّي إمّي

بَين الشمس... وغُرِّة إمّي

غُرِّة إمّي أحلا... أحلا

بَين الغَيمِه... وجَبهِة إمّي

جَبهِة إمّي أعلا... أعلا

بَين الكِلمِه... ودمعِة إمّي

دمعِة إمّي أغلا... أغلا

وما بتِفرُق بَن ألله وإمّي

ألله بْقَلبو ضِحكِة إمّي

وإمّي بْقَلبا ضِحكِة ألله