بوصل على الكورنيش
قبل كْتار
حتّى قبل
بيّاع لِمْناقيش
وقت اللي بيكون
الفجر محتار :
فزعان عا بابو
يْدقّ نْهار
والليل
عم بيضبضب كْلاكيش ...
والعتم مش باقي
بجنحو ريش
شاف السما
عن طاولة لِقْمار
مستعجلِه
تَ تْضبّ آخر "فيش" ...
والبحر لافف
موجتو سيكار
والشطّ قبلو
بلّش التحشيش
عم ينطر الموجه
عَ جمر النار
متل الصبي
اللي ناطر البخشيش ...
وْتشرين مستأجر
شمس أيّار
مْن الصيف يمكن
يلحقو طْراطيش
وماخد شويّة غيم
من آذار
مديون
عم بيركّب طْرابيش ...
بتكون بعدا نايمه
بيروت
وْجنبي
نهار وليل عَ الكورنيش
في ليل عم بيقول :
" خايف موت "
وْفي نهار عم بيقول :
"بدّي عيش ".
