قلّي الهوا لِ بْيشتغل عند الخريف:
«وْراق الصفر والخضر قدّامَك
عدُّن مليح وْعِدّ إيّامَك
عَ الغصن شو باقي … وشُ واقع عَ الرصيف»
والنار قالتلي :
«وحْياة لون الجمر بِ كْوانين
النار لْ بقلبَك والعه مْنِ سْنين
رح تنطفي … متلي»
والمَيّ قالتلي : «الوقت متل النهر
لمّا بيوصل عَ البحر … بيموت
بْيقطف بِ مشوارو عنِ جْنابو زهر
تَ يْحطّ باقة زهر … عَ التابوت»
والأرض قالتلي : «إنِت متلي تراب
وجْميلَك عْليّي
إنتا بتزرعني … وبعد ترم الغياب
رح تنزرع فيّي»
