مشتاق شوف مْنام
صرلي شهر قلقان مش عم نام…
مشتاق كنت… وْمن كتر شَوْقي
تا إشتريلي مْنام عا ذوْقي
اسْتهْديت عا بيّاعةِ الأحلام…
قالت إلي: «في حلم حَقّو يوم
بْيخلص معك يمكن بساعةْ نوم
وْلولا نسيتو الصبح… مَ بْتنلام…
وْرح يوصل مْنامات هالجمعَه
واقف عليّي الواحد بْ جمعه
وْكرمالك بْبيعو بْ خمس تيّام…
وْفي حلم غالي شْوَيّ… حقّو شهر
لازم تنام كتير تَ تْكفّيه
وْفي حلم غالي كْتير… حقّو دهر
هيدا حلم بتشوف إمَّك فيه».
