كان البحر تعبان
ومْواجو تقالْ
والشمس وجّا
متل أيّامي… حزين…
حطّيْت كمشةْ رمل
بالإيد الشمال
دْلَقْتا شْويّ شْوَيّ
عا إيدي اليمين…
كمشة رمِل
كانت صخر… كانت جبال
مرْقِتْ بِ مطْحَنْةِ العمُر
صارت طحين…
يا عُمر
يا قصر لْ بَنَيْتو عالرمال
عم يكرج قْبالي الوقت
كرجِةْ غزال
وْعم يزحطو
من بين صابيعي… السنين…
حسّيْت
عم بكتب قصيدِہ بالرمِل
وسْطورها
مْنِ سْنين عمري الضايعين
وْجنبي البحر
كاتب قصيدِہ عَ الرمِل
وحْدُو البحر عرفان
كاتبها لَمين…
