تبقى ثقافة الحياة أقوى من عويل الموت. اللبنانيون مستمرون بنضالهم حتى الرمق الأخير. ورغم سيرهم في حقول الألغام، إلا وأنّهم غير آبهين لتفجيرات الجوع والفقر والفساد والطائفية التي فرضتها عليهم السلطة المستبدّة والظالمة. لم يعد الجائع يأبه لمصيره ولا حتى الثكلى أو المريض أو المديون... جميعهم يحاربون بدمائهم لإنقاذ ما تبقّى من وطنهم المشرذم لربّما يحمل الجيل الجديد المشعل ويكمل المسيرة.
| رأى المخرج والناشط لوسيان بورجيلي عبر «تويتر» أنه «لو بـ 18تشرين الأول طلعوا الحكام وقالوا:منعتذر من الشعب، فشلنا فشلاً ذريعاً ومش عارفين نحكم. رح نتحمل مسؤولية ونستقيل ونقصر ولاية المجلس ونرجع السلطة للشعب لتصير انتخابات جديدة بعد 6أشهر بأذار 2020وحكومة إنتخابات/إنقاذ تحكم من هلق لوقتها. مش كان 100مرة أحسن من يلي عم يصير اليوم؟». |
| اعتبرت الفنانة سيرين عبد النور عبر «تويتر» أنه: «يللي عم بصير بـ وسط بيروت ما بيشبه الثوار ولا القوة الامنية وكإنو لعنة صابتنا كأنو الشر بحد نفسو مسيطر على العقول هيدا المشهد الغير سلمي الوحشي من الطرفين ما بظن بوصل لبنان على بر الأمان... لبنان ينتفض بدنا وطن ما بدنا حزب! لبنان الله يحميك». |
| رأى الفنان سعد رمضان عبر «تويتر» أنه «احلى شي بالطبقة السياسية الفاشلة اللي عنّا انو بعد 3شهور والشعب عم يموت وكل شي عم ينهار، وبفتح التلفيزيون هلق بلاقي خبر انو عم يتقاتلوا على الوزارات، بتحسّ انو ما عندن تلفيزيونات وانو الحياة حلوة. يا عمّي بعد ما فهمتو انو هيدي الطريقة ما بقى تمشي؟ ولك الله يريحنا منكن!». |
| رأت الإعلامية ريما نجيم عبر «تويتر» أنه «كنا مندفع كل فاتورة فاتورتين وما عم نحكي. كنا عم نشوف السواح عم يهربوا من عنّا وعم نتفرّج ع شركات عم تأفلس وساكتين. كنا عم نشوف ناس عم تموت من القهر والعوز ع بواب المستشفيات وناطرين. كنّا عم نشوف بلدنا عم ينطفي قدامنا وخبراتنا عم تاكلوها وما عم تشبعوا ! ولما حكينا صرنا زعران ؟» وأضافت في تغريدة أخرى: «كنّا عم نموت كل يوم مية موتة وساكتين! كنّا عم نموت بحوادث السير على طرقات غير مؤهلة وانفاق معتّمة! كنّا عم نخسر أشغالنا واحد ورا التاني وقبلانين! كنّا عم ناخد دوا مزوّر وناكل طعام غير مطابق للمواصفات ومسكرّين تمّنا! كنّا عم ندفع ضرائب ع خدمات ما عنّا ياها وساكتين». |
| أشارت الإعلامية نانسي السبع عبر «تويتر» الى أنه «قديه في ناس قاعدة ببيوتا عم تتفرج عاللي عم بيواجهوا المسيل للدموع وخراطيم المياه بس لانن بدّن يأمنوا ثمن علبة اللبنة اللي صارت بـ8آلاف وعلبة التونا اللي صارت بـ 3آلاف. ما بدن عسكر يواجهن بدن سلطة ما تموّتن من الجوع! #ونحن_نرى_ذلك_بصمتٍ_بصمت». |
| علّق الممثل الكوميدي نعيم حلاوي على طرد السياسيين من الأماكن العامة عبر «تويتر»، وقال ساخراً: «اذا رح تضلوا تعاملوا السياسيين بهالطريقة وما تخلوهن يتهنوا بالمطاعم والأماكن العامة بُكرا بيتركوا البلد وبيهاجروا، هل بتريدوا هالشي؟». |
| رأت الممثلة عايدة صبرا عبر «تويتر» أنه «يللي ملزّق بالـ Altico بيلزمه كذا ضربة ليقبع!» وأضافت: «#لبنان_الجديد #ثورة_لبنان #كلن_يعني_كلن #مستمرون». |
| غرّد المخرج فادي حداد وقال: «لبنان كناية عن سياحة واستشفاء ومصارف. بإذن الله قبل ما يفلو بيكونو مدمرين»، مضيفاً أنّ «كل الشرفاء رح تموت رأسها مرفوع إلا الحرامية. رح نعمل عنكم أفلام نوثق سرقتكم للتاريخ». وتابع رسالته الى السلطة عبر «تويتر» بالقول: «خربتو بيت الناس كلها، من الصغير للكبير. من الآخر، شياطين السلطة». |
