- Allo يورغو؟ شو هالضجة حدّك؟ أولادك؟
-لأ، التلفزيون.
- عَ سيرة الأولاد، قالوا إنك طفل معجزة وممثل من بطن إمك، وشاركت بأول أدوارك قبل ما تخلق.
- إيه والله معجزة. ومش بس هيك، كنت آخِد دور كوزيت وهي جنين ببطن إمها فانتين بمسلسل "البؤساء". يومها إمي اكتشفت إنها حامل خلال التصوير، وهيك شاركت بأول دور بحياتي وأنا بعدني ببطنا.
- قالوا إنك نجم بمواصفات عالمية، وبطفولتك شاركت بفيلم "شبح الماضي". ليش بعيد عن السينما لِ ممكن توصّلك على "كان" أو الأوسكار؟
-هي لِ بعيدة مش أنا، والانتاجات المنيحة كتير قليلة. إنعرض عليي كتير أفلام بس أنا كتير "نيقة" بالمسلسلات، وبالسينما أكتر لأن السينما مسؤولية أكبر. انشالله خير وما حدا بيعرف أيمتى بتجي الفرصة المناسبة.
- بالمناسبة، قالوا إنك ورثت الوسامة والموهبة من أهلك. انت شو عطيت ألسي فرنيني وجورج شلهوب بالمقابل؟
- يا دلّي عليهن، ما أعطيتن غير الهمّ والغم وسهر الليالي. يا حرام، عن جدّ الله يساعدن عليّي.
-إسمحلنا فيها، إنت اعطيتن الفخر بنجم بينرفع الراس فيه، ولقب تيتا وجدّو و 4 حفدة معبيّين حياتن بهجة. وعَ سيرة البهجة، قالوا إنك نجحت كتير بالدراما، وأكتر بالكوميديا. شو رأيك؟
- أنا بحب الدراما والكوميديا، وبحسّ حالي فيهن تنيناتن والناس حبّوني بالنوعين. أوقات حسب "الموود" بيطلع عبالي ألعب كوميديا أو دراما، بس مش عطول تجري الرياح بما يشتهي المزاج.
- جرت الرياح معك بما لا يشتهي الزواج . وقالوا إنك انفصلت عن زوجتك الالمانية بسبب عدم الاتفاق على عدة أمور. من شو بتشكي البنت اللبنانية لرحت عَ المانيا؟ وممكن عدم إتقانك للألمانية هو أحد الاسباب؟
- علاقات الحب والصداقة ما إلها علاقة بالبلد. ممكن شخص بالصين يكون اقربلِك من اخواتك. البنت اللبنانية "عَ سلامتها" طبعاً، بس ما بحب التعميم، و بعتبر كل بنت إلها خصوصيتها. معي أنا، هيك ساقبت، وبعتبر كل بنات العالم" عَ سلامتن"، المهم التوافق. وإذا فكرِك صار سوء تفاهم بسبب حواجز اللغة، فلأ. نحنا منحكي كتير منيح انكليزي، يعني كنا نتخانق عن وعي كامل. ما في شكّ إنو اختلاف الثقافة مؤثر، بس نحنا ما خَلقلنا حواجز، كان مصدر غنى وتوافق، وهيدا لِ خلانا نتزوج ونبني.
- بسيطة، بس باسم جمهورك النسائي العريض، يا ريت تركّز أكتر من هلأ ورايح… عالبنت اللبنانية.
