ضجّت مواقع التواصل الإجتماعي بخبر وفاة الشيف رمزي، أمس الأحد، إثر نوبة قلبيّة مُفاجِئَة.
وودّعت الممثلة اللبنانيّة ليليان نمري الشيف رمزي بطريقةٍ مؤثّرة.
فكتبت على حسابها عبر "فيسبوك": "هلق عرفت يا شيف رمزي انك فلّيت. ولأوّل مرةّ بتخونّي الحروف شو بدي إحكي وأوصفك، تمنّيت وقلت يا ريت اليوم انقطع الانترنت وما قريت الخبر".
وتابعت ليليان نمري: "كلّ كلام المحبّة ما بيوفوك يا طيّب، يا كريم، يا محِبّ، يا صاحب الضّحكة النّابعة من القلب. ما بنسى كيف زرت عليا وقت كانت مريضة، ونظراتك المليانة حنيّة عَ قد ما بتحب أهلك، ووقت اتّصلت فيّي وقلتلي اطلعي إنتي و"نحيفة" عالكفاءات ناطرينيك وعرضت مسرحيتي وكان نهار مليان بالخير، بالغدا اللي كنت عاملو للموظفين وعائلات ذوي الهمم، وسؤالك الدايم عنّي ومرورك ع صفحاتي بضحتك اللي ما بتشبه حدا".
وختمت نمري قائلةً: "صوتي مخنوق ومصدومة تذكرّت لمن حكيتك وقلتلك بتقبل كون تلميذتك واتعلّم كم طبخة إيطاليّة؟ وضحكت من قلبك قلتلي اطلعي وبعطيكي شهادة زعيمة الأكل الإيطالي. وشو بدي قول قصص مهضومة عنك؟ بخاطرك يا صديقي يا مهضوم. الله يرحمك ويصبر عيلتك ومحبينك. ضيعانك يا شيف تموت، ويبقوا الاشرار بهالدني. يا تقي ومؤمن ما فينا نقول إلا حكمتك يا رب. ولتكن مشيئتك. إلى اللقاء يا رمزي وعلى رجاء القيامة نصبر".
